بەشێکی زۆری خەڵک بەدەست نەخۆشیەکانی گورچیلەوە دەناڵێنن بێئەوەی درک بە نیشانەکانی بکەن و بزانن کێشەی گورچیلەیان هەیە، بۆیە نەخۆشیەکانی گورچیلە بە بکوژی بێدەنگ ناودەبرێت.
نیشانە سەرەتاییەکانی توشبوون بە نەخۆشیەکانی گورچیلە:
-ئاوسانی قاچەکان
کاتێک کردارەکانی گورچیلە لاواز دەبن و گورچیلە ناتوانێت بەباشی ئەنجامیان بدات ئەوا کۆبونەوەی سۆدیۆم دەبێتە هۆی دروستبوونی وەرەم یان ئاوسانی لە قاچەکاندا.
-بێهێزی
لەگەڵ لاوازبوونی گورچیلەکان و دروستبوونی کێشەکانی کەسی توشبوو بەردەوام زۆر بەخێرای هەست بە ماندووی و بێهێزی دەکات، هەروەها وزەیەکی تەواوی بۆ چالاکیەکانی ڕۆژانە نییە و بەردەوام حەزی بە پشوودانە.
-لەدەستدانی خواستی خواردن
لەئەنجامی کۆبونەوەی ژەهرەکانی وەک یۆریا، کریاتینین و ترشەکان لە جەستەدا کەسی توشبوو بە نەخۆشیەکانی گورچیلە خواستی خواردنی زۆر کەم دەبێتەوە.
-دڵتێکەڵهاتن و ڕشانەوە لە بەیانیاندا
دڵتێکەڵهاتن و ڕشانەوە لە بەیانیاندا نیشانەیەکی دیکەی لاوازبوونی کردارەکانی گورچیلە و دروستبوونی کێشەکانیەتی.
-کەمخوێنی
کەمبوونەوەی ڕێژەی هیمۆگڵۆبینی خوێن نیشانەیەکی دیکەی توشبوون بە نەخۆشیەکانی گورچیلەیە.
-وشکبوونەوەی پێست و زۆر خورانی
وشکبوونەوەی پێست و زۆر خواردنی بەزۆری لەو کەسانەدا دەردەکەوێت کە کێشەی گورچیلەیان هەیە، هەروەها هەندێکجار بۆنی پێست زۆر ناخۆش دەبێت.
-ئازاری پشت و خوارەوەی سک
ئازاری پشت و خوارەوەی سک لەوانەیە نیشانەیەک بێت بۆ هەبوونی کێشە لە گورچیلەکاندا وەک بەرد یان هەوکردنی گورچیلە.