ئاژانسی یارمەتیدانی ئاوارە فەلەستینییەکان (ئۆنروا) ڕایگەیاند، چوار هەزار لۆریی هەڵگری ئارد و خۆراک ئامادەن بۆ چوونە نێو غەززە.
ئۆنروا پێشبینیی کرد هێرشەکان بۆ سەر کاروانە فریاگوزارییەکان لە کەرتی غەززە بە هاتنی یارمەتییە مرۆییەکان دوای ئاگربەست کەم ببێتەوە.
نەتەوە یەکگرتووەکانیش هەروەها ڕایگەیاند: چوونە نێوەوەی یارمەتییە مرۆییەکان بۆ غەززە ١٥ خولەک دوای جێبەجێکردنی ئاگربەست دەستی پێکرد.
بەپێی ئەم ڕاپۆرتە، لۆرییە هەڵگرەکانی کەلوپەلی مرۆیی بەرنامەی جیهانیی خۆراک لە دەروازەکانی “زیکیم” و “کەرەم شالۆم”ەوە چوونە نێو غەززە.
بەرنامەی جیهانیی خۆراک بەنیازە ڕۆژانە لە ڕێگەی ڕێڕەوە مرۆییەکانەوە و لە دەروازەکانی میسر، ئوردن و ئیسرائیلەوە، خۆراک بۆ غەززە بنێرێت.
نەتەوە یەکگرتووەکان جەختی کردەوە ئەم ئاگربەستە، بۆ وەڵامدانەوەی پێداویستییە مرۆییەکان لە غەززە، گرنگە و دەبێت ئاسایش و دەستگەیشتن بە دەروازەکان دەستەبەر بکرێت.
