کاتێ كارەساتەکەی یەکی شوبات، نانی جەژن و فرمێسكی تێكەڵ كردین و کوردستانی تازیەبار کرد، بەندە لە سلێمانییەوە گەڕامەوە و بۆ دەمەوئێوارە لەگەڵ هاوكارانم ژمارەیەكی رەشپۆشی (رۆژنامەی خەبات)مان دەرچواند. كاتێ وێنەی شەهیدەكانمان ریزدەكرد، قەبارەی خەسارەتەکە بە حەددێک گەورە بوو، نزیك لەو رەشبینییەی دەكردینەوە كە زەحمەتە جارێكی دیكە كوردستان و پارتی و یەكێتی بكەونەوە سەرپێ.
ئەو دەم كەس نەیدەتوانی خوێنی پارتییەكان و یەكێتییەكان لێكجیابكاتەوە. دیمەنەكە تەنیا خوێنی كورد و خوانەناسیی دوژمن و هەولێرێكی مات و كوردستانێكی خەمگینی دەنواند و هیچی تر..
من بە ش بە حاڵی خۆم هەرگیز هەولێرم بەو ماتییە نەدیبوو..
چەند هەفتەیەك بەسەر ئەو ماتەمگێڕییەدا تێپەڕی، وەك ئەوەی خودا بیەوێت پرسەمان پێ بشكێنێ و پێمان بڵێ: هەستنەوە سەرپێ هێشتا كارتان لە پێشە، بەفرێكی جوانی باراند و بەرگی رەشی هەولێری بە تارای سپی گۆڕی.. بەدەم شەڕەبەفرەوە فرمێسکەکانمان سڕی و دووبارە هەستاینەوە سەرپێ و كەوتینەوە رێ ..
درود بۆ شەهیدان، تێکۆشەرانی نەوەی زێڕین و ئەوانەی خەڵک بە دڵ بۆیان گریان و بە دڵ ماتەمیان بۆ گێڕان..
ئاریان فەرەج