کارلۆ ئەنچیلۆتی ڕاهێنەری یانەی ڕیال مەدرید دووپاتیکردەوە کە ڕایۆ ڤالیکانۆ تەحەدای گەورە بۆ لۆس بلانکۆس دەکات لە قۆناغی 27ی لالیگا کە بڕیارە سبەی یەکشەممە لە یاریگای سانتیاگۆ بێرنابیۆ بەڕێوەبچێت.
یانەی شاهانە بە کۆکردنەوەی 54 خاڵ پلەی سێیەمی ڕیزبەندییەکەی بەدەستهێناوە و تەنها 3 خاڵ لەدوای بەرشەلۆنەی پێشەنگەوەیە، هەروەها بە 2 خاڵ لەدوای ئەتلەتیکۆ مەدریدی دووەمەوەیە.
ئەنچیلۆتی لە میانی کۆنگرە ڕۆژنامەوانییەکەی یارییەکەدا ڕایگەیاند: ڕایۆ ئاستێکی باشی هەیە، تیپێکی ڕێکخراو و چڕ و پڕە، تەحەددایەکی گەورە بۆ ئێمە دروستدەکەن، دەبێت لە شەڕەکەدا بمێنینەوە، بەدەستهێنانی خاڵیش زۆر گرنگە.
ئاماژەی بەوەشکرد، لە دۆخێکی باشداین، لە دوای یارییەکەی سێشەممەوە دەرفەتی چاکبوونەوەمان بۆ ڕەخسا (بەرامبەر ئەتلەتیکۆ مەدرید لە یاری گەڕانەوەی قۆناغی ١٦ی چامپیۆنزلیگ)، هیوادارین یارییەکی نایاب ئەنجامبدەین.