ڕێکخراوی تەندروستیی جیهانی و ڕێکخراوی کەشناسیی جیهانی، ڕۆژی دووشەممە، ٢٥ی ئابی ٢٠٢٥، لە ڕاپۆرتێکی هاوبەشدا هۆشدارییان داوە لەبارەی زیادبوونی مەترسییە تەندروستییەکان بەهۆی گەرمای توندەوە لە شوێنی کار.
لە ڕاپۆرتەکەدا هاتووە، گۆڕانی کەشوهەوا بووەتە هۆی ئەوەی شەپۆلەکانی گەرما بەهێزتر و دووبارەتر ببنەوە. ئەو کرێکارانەی لە کەرتەکانی کشتوکاڵ، بیناسازی و ماسیگرتندا کار دەکەن، بە توندی ڕووبەڕووی کاریگەرییە تەندروستییەکانی گەرما دەبنەوە.
دکتۆر جێرمی فارار، جێگری بەڕێوەبەری گشتیی ڕێکخراوی تەندروستیی جیهانی، گوتی: “گەرمای توند هەڕەشە لە تەندروستی و بژێویی ملیاران کرێکار دەکات، بەتایبەتی لە کۆمەڵگە لاوازەکاندا.”
بەپێی ڕاپۆرتەکە، زیاتر لە ٢.٤ ملیار کرێکار لە سەرانسەری جیهاندا ڕاستەوخۆ زیانیان بەردەکەوێت و بەرهەمدارییان بە ڕێژەی ٢٪ بۆ ٣٪ دادەبەزێت لەگەڵ هەر پلەیەک بەرزبوونەوەی گەرما لە سەرووی ٢٠ پلەی سیلیزییەوە. مەترسییە تەندروستییەکان بریتین لە گەرمابردوویی، وشکبوونەوە، تێکچوونی گورچیلەکان و کێشەی دەماری.
هەواڵی پێشوو