ئەمڕۆ لە سێ شوێنی جیاواز لە ئیدارەی سەربەخۆی زاخۆ ئاگر کەوتەوە و بەرگریی شارستانیی زاخۆ توانی ئاگرەکان کۆنترۆڵ بکات.
ئەمڕۆ شەممە 6ـی ئەیلوولی 2025، ڕاگەیاندنی بەرگریی شارستانیی زاخۆ بڵاوی کردەوە، بەرەبەیانی ئەمڕۆ کاتژمێر 6:45، ژووری کۆنترۆڵی بەرگریی شارستانی لە ڕێگەی پەیوەندییەکی تەلەفۆنییەوە ئاگادار کرایەوە، ئوتۆمبێلێکی بارهەڵگر لە نزیک قەسری زەر لە زاخۆ ئاگری گرتووە و بنکەی زاخۆی بەرگریی شارستانی دەستبەجێ گەیشتنە شوێنەکە و ئاگرەکەیان کۆنترۆڵ کرد.
لە ڕاگەیاندراوەکەدا ئاماژە بەوەش کراوە لە هەمان کاتدا سەموونخانەیەکیش لە “تاخێ ئەردەوان” ئاگری گرت و لەوێش ئاگرەکە لە لایەن هێزەکانی بەرگریی شارستانییەوە کۆنترۆڵ کرا.
نیو کاتژمێر پاش ئەو دوو ڕووداوە، دیسان لە ڕێگای پەیوەندییەکی تەلەفۆنییەوە، ژووری کۆنترۆڵ ئاگادار کرایەوە کە دوو خێمە لە کەمپی بێرسڤی 2 ئاگریان گرتووە و لە ماوەیەکی کورتدا ئەم ئاگرەش لە لایەن بنکەی دەرەوەی شاری بەرگریی شارستانییەوە کۆنترۆڵ کرا.
بەرگریی شارستانیی ئیدارەی سەربەخۆی زاخۆ ئاماژەی بەوەش کردووە، ئەم سێ ئاگرکەوتنەوەیە هیچ زیانێکی گیانییان لێ نەکەوتووەتەوە.