بە ئامادەبوونی حەمەی حەمەسەعید، وەزیری ڕۆشنبیری و لاوانی حکومەتی هەرێمی کوردستان، رۆژی پێنجشەممە 9ـی تشرینی یەکەمی 2025، لە پارێزگای هەڵەبجە پێنجەمین دیداری هەورامانناسی بەڕێوەچوو.
دیدارەکە بە ناونیشانی خولی د. ئەفراسیاو هەورامی و بە ئامادەبوونی پارێزگاری هەڵەبجە و ژمارەیەکی بەرچاو لە کەسایەتی و ڕۆشنبیران و شارەزایانی مێژوو و کولتووری دێرینی هەورامان بە پشتیوانی دامەزراوەی کەریمی عەلەکە سازکرا.
وەزیری ڕۆشنبیری و لاوان لە وتەیەکدا، سوپاس و پێزانینی خۆی بۆ دامەزراوەی کەریمی عەلەکە و سەرپەرشتیارانی دیدارەکە دەربڕی و جەختیکردەوە، هەورامان ناوەندێکی گرنگ و دێرینی ژیار و شارستانییەتە و خاوەن کولتوورێکی ڕەگداکوتاوی پێکەوەژیان و لێبوردەییە و ئەو کولتوورە پێویستیی بە خزمەتکردنی زیاترە.
وەزیری ڕۆشنبیری و لاوان خەڵاتی ڕێزلێنانی دامەزراوەی کەریمی عەلەکەی پێشکەش بە بنەماڵەی د.ئەفراسیاو ھەورامی، نووسەر و لێکۆڵەر کرد.
لە بەشێکی دیکەی دیدارەکەدا، ژمارەیەک توێژینەوە و وتاری زانستیی لە لایەن توێژەرە بەشداربووەکانی دیدارەکە پێشکەش کران.