عەبدولقادر بطوش شنگالی، بەربژارێ هەژمارە (48) ل سەر لیستا (275) یا پارتی دیموکراتی کوردستان، ل بازنێ پارێزگەها نەینەوا بۆ جڤاتا نوێنەرێن عیراقێ، پەیام و ئارمانجێن خۆ بۆ جەماوەرێ پارێزگەهێ ئاشکەرا کرن.
بەربژێر شنگالی بۆ ئاژانسا نووچەیا زاگرۆس ڕاگەهاند کو دروشمێ وانێ سەرەکی بریتی یە ژ: “هەڤپشکی، هەڤسەنگی، لێکگەهشتن و لهەڤکرن.” د درێژاهیا ئاخفتنێن خۆدا، گۆت: “ئارمانج و مەرەما مە یا سەرەکی ئەوە کو ل ژێر قوبەیا پەرلەمانێ عیراقێ، ببینە دەنگێ حەق و ڕاستیێ، و دڤێت ئەو دەنگە ژبۆ نەهێلانا ستەم و زۆرداریێ ل سەر خەلک و وەلاتییێن پارێزگەها نەینەوایێ ب گشتی، و قەزا شنگالێ ب تایبەتی، بگەهیتە هەمیان.”
عەبدولقادر شنگالی، د لێدوانەکێ دا بۆ ئاژانسا نووچەیا زاگرۆس، زێدەتر گۆت: “ئەم دەنگ و زمانێ وان کەسانین یێن دەنگێ خوە نەبوویە، و ئەم پشت و پەنا و هاریکاریا وان کەسانین یێن چ کەس نەبوویە عەون و پشت بۆ وان.”
بەربژێرێ پارتی دیموکراتی کوردستان، گرنگیا پارێزگەها نەینەوایێ بۆ پارتیا خۆ دووپات کر و ڕاگەهاند: “پارێزگەها نەینەوا گەلەک یا گرنگە بۆ مە پارتی، ژبەرکۆ ئەگەر ئەم ل ڤێ پارێزگەهێ بهێز بین، دێ ل بەغدا ژی بهێز بین.”
هەروەسا ئاماژە ب وێ چەندێ کر کو جەماوەرێ پارتی د هەلبژارتنێن بۆری دا گەلەک بهێزبوون ل نەینەوا و ب باشی چوونە دەنگدانێ.
ل دوماهیا گۆتارا خۆ یا گەرم دا، عەبدولقادر عەبدوڵڵا بطوش شنگالی،متمانەیا پارتی بۆ هەلبژارتنێن ڤێ جارێ ژی دووپات کر و ڕاگەهاند: “ڤێ جارێ ژی ئەم وەک پارتی ل وێ باوەریێنە دەنگەکێ باش و بەرچاڤ ل نەینەوا بینین و داخواز کر ، دەنگێ وەلاتییان بۆ لیستا (275) یا پارتی دیموکراتی کوردستان بیت.