وەزارەتی نێوخۆی ئەڵمانیا ڕۆژی سێشەممە، چوارەمی تشرینی دووەم، گرووپێکی ئیسلامیی بە ناوی “مسلم ئینتەرئەکتیڤ”ی قەدەغە کرد و فەرمانی هەڵوەشاندنەوە و دەستبەسەرداگرتنی سەروەت و سامانەکەی دەرکرد، بەهۆی دژایەتیکردنی سیستەمی دەستووری و تێگەیشتنی نێوان گەلان.
بەپێی ڕاپۆرتی میدیاکانی ئەڵمانیا، لە بەیانیی ڕۆژی چوارشەممەوە، بە بڕیاری دادگا، ئۆپەراسیۆنی پشکنین دژی ئەم گرووپە لە حەوت شوێنی شاری هامبۆرگ دەستی پێکردووە. هاوکات، لە چوارچێوەی لێکۆڵینەوەکاندا لەسەر گرووپەکانی دیکە وەک “نەوەی ئیسلام” و “ڕاستیی ئیسلام”، دوازدە شوێنی دیکە لە ویلایەتەکانی بەرلین و هێسن پشکنینیان بۆ کراوە.
ئەلێکساندەر دۆبرینت، وەزیری نێوخۆی ئەڵمانیا، لەم بارەیەوە بە میدیاکانی ڕاگەیاند: “هەر کەسێک بە شێوەیەکی توند لە شەقامەکانماندا داوای خەلافەت بکات، بە شێوەیەکی قبووڵنەکراو ڕق و کینە دژی دەوڵەتی ئیسرائیل و جوولەکەکان بڵاو بکاتەوە، و مافەکانی ژنان و کەمینەکان سووکایەتی پێ بکات، بە توندترین ڕێوشوێنی یاسایی لەلایەن حکومەتەوە ڕووبەڕووی دەبێتەوە. ئێمە ڕێگە نادەین ڕێکخراوەکانی وەک ‘مسلم ئینتەرئەکتیڤ’ بە ڕق و کینەی خۆیان کۆمەڵگەی ئازادی ئێمە پارچە بکەن، دیموکراسییەتەکەمان سووکایەتی پێ بکەن و وڵاتەکەمان لە ناوەوە هێرش بکەنە سەر.”