ئومێد وەڵاتی
هەڵبژاردن گولپیتکا پرۆسا دیموکراسیێ یە، هەر هەرێم و وەڵات و کیانەکێ دیموکراسی پێخەمەت بەردەوامیدان ب سیستەمێ خو یێ حوکمڕانیێ پرۆسا هەڵبژاردنان بۆ وێ گرنگترین ئامرازێ سیاسیە، پشتی دامەزراندنا حکومەتا هەرێما کوردستانێ ئەڤ پرۆسا هەنێ ژ بۆ دامەزراندن و پێکئینانا پەرلەمان و کابینا حکومی هاتە ئەنجامدان و ل دیڤدا پشتی ژنافچوونا ڕژێما عێراقێ، هەرێما کوردستانێ وەک پێکهێنەرەکێ سەرەکی یێ دەولەتا فیدراڵی یا عێراقێ د هەڵبژارتنێن ئەنجومەنێ نوینەرێن عێراقێدا بەشداربوویە، دناڤ وان قەوارە و ئالیێن سیاسیدا کۆ ل هەلبژارتنان بەشداربووینە، پارتی دیموکراتی کوردستان ئێک بوویە ژ وان هێز و لایەنێن سیاسی کو ل هەمی هەڵبژاردناندا سەرکەفتنەکا باش ب دەستڤە ئینایە، ئەوژی ب ڕێکا متمانە و باوەڕی پێدانا خەلکێ کوردستانێ ب پارتی ژبەر بەڕەڤانیکرنا بهێز و ڕژدیا پارتی لسەر هەمی مافێن گەلێ کوردستانێ دعێراقا فیدراڵدا.
پرسیار ل ڤێرە ئەوە، ئەرێ بوچی دناڤ هەمی دانوستانێن دناڤبەرا هێزێن سیاسی یێن عێراقێ دگەل پارتێن سیاسی یێن کوردستانێدا ئالیێن سیاسی یێن عێراقی (عەرەب) دکارن هەمی وان ئەجێندا و مەرەمێن خویێن سیاسی و نەتەوەیی ل هەمبەری کوردستانێ بجهـبینن، لێ دەما پارتی دیموکراتی کوردستان دناڤ وان دانوستاندنان دابیت نەشێن خواستەک و ئارمانجێن خو ب سەر هەرێما کوردستانێ و قەوارێ هەرێمێدا بسەپینن؟
ئەڤە دزڤریت بۆ وێ چەندێ کو پارتی و ب تایبەت سەروک مەسعود بارزانی چ جارا دبەرهەڤ نەبووینە بچویکترین سازشێ لسەر مافێن گەلێ کوردستانێ بکەن و دانەپێشیا بەرژەوەندیێن نەتەوەیی ل پێش بەرژەوەندیێن خۆیێن حزبی هەردەم باڵاترین سیاسەتا وان بوویە، کۆ ئەڤەژی بەروڤاژیا سیاسەت و کارێ پارت و لایەنێن دی یێن سیاسی یێن هەرێما کوردستانێیە.
هەردەما پارتی ل گوڕەپانا سیاسیا عێراقێدا یا بهێز بوویبیت ب هەر ئاوایەکێ بوویبیت و قەبارێ باجا پێداگری و هەوڵێن وێ بۆ چەسپاندنا مافێن کوردستانیان چەند بوویبیت خو پاشڤە نەکشاندیە، لەوما دڤێ هەڵبژاردنا بهێتدا گرنگە هەر تاکە کوردەک سەحکەتە رابردوویێ هەمی لایەنێن سیاسی یێن هەرێمێ و بزانیت کا کیش لایەن بەرژەوەندیێن نەتەوەیی ل پێش بەرژەوەندیێن خو یێن حزبی داناینە، دەنگێ خو بدەتێ و ب دەنگێ خۆ دێ بیتە خشتەک ژ خشتێن ئاڤا کرنا دیوارەکێ موکم ل پێشیا هێز و لایەنێن عێراقی کو دڤێن ئیرادا خو یا ناڤەندخوازیێ بسەپینن و قەوارێ هەرێما کوردستانێ بچویکتر و بچویکتر لێبکەن، ئەگەر نێرینەکا باش بۆ کار و کریارێن هەمی لایەنێن سیاسی هەبیت گۆمان تێدا نیە کۆ دڤێت ب هەمی هێز و شیانێن خۆ پشتگیریا پارتی و لیستا٢٧٥ یا پارتی دیموکراتی کوردستان بکەن داکۆ بکاریت وەک هەر جار ڕێگری ل خەونێن وان هێز و ئالیێن عێراق و ناڤخویی یێن هەرێمێ بکەت کو مەرەما وان یا سەرەکی بچویک کرن و لاوازکرانا قەوارێ هەرێمیێە و ژ وێژی زێدەتر تا ئاستێ نەهێلانا قەوارێ.
ژ بۆ کوردستانەکا بهێزتر ل هەمبەر نەیارێن کوردستانێ یا گرنگ ئەوە دەنگدەر ویژدانا خو بکەتە دادوەر و کریار و گوفتار و هەلویستێن هەمی لایەنا بکەتە تەرازویەکا دادپەروەرانەدا و ببینیت کا ل ڕۆژێن بەرتەنگدا کێ خو کریە گوری ملەتێ خو و نەهێلایە گەل و ئاخ بکەڤنە دەستێت شوڤینی و تێهنیێن خوین و گیانێ کوردا وی بهەلبژێرن و باوەڕیێ بدەنێ.
بێگومان باوەڕیدان ب پارتی ب رێبەراتیا سەروک بارزانی ئەو پێنگاڤا گرنگە کو خیچ و خواریا حوکمڕانیێ ل بەغدا بهێتەڤ ڕاستکرن و سنورەک بۆ هەر دەستدرێژیەکێ لسەر ئاخ و گەلێ کوردستانێ بهێتە دانان.