“کوردەواری”، ژیانی سادەی گوند دەهێنێتە گەلەری میدیا

پانزەیەمین پێشانگای تایبەتیی هونەرمەند ئازا حەسیب قەرەداخی بە ناونیشانی “کوردەواری” لە گەلەری میدیای هەولێر کرایەوە، کە تێیدا ژیانی سادە و ڕەسەنی کوردەواری لە چوارچێوەی چەندین تابلۆی هونەریدا نمایش کراوە.

پێشانگاکە، کە لەلایەن ئاریان سەڵاحەدین، بریکاری وەزارەتی ڕۆشنبیری و لاوانەوە بەسەرکرایەوە، سەرنجی ژمارەیەکی بەرچاو لە هونەرمەندان و خەڵکی بۆ لای خۆی ڕاکێشا. تابلۆکان دیمەنەکانی ژیانی ڕۆژانە، جلوبەرگی کوردی، و سروشتی گوندەکانی کوردستانیان بە ڕەنگ و شێوازێکی تایبەت نیشان دەدا.

ئازا حەسیب قەرەداخی لەم پێشانگایەدا هەوڵیداوە ئەو لایەنە جوان و سادەیەی ژیانی کوردەواری زیندوو بکاتەوە کە لەناو ژیانی مۆدێرنی شارەکاندا وردە وردە بەرەو کاڵبوونەوە دەچێت.

پێشانگای “کوردەواری” تا ڕۆژی ١١ی حوزەیران بەردەوام دەبێت و ڕۆژانە پێشوازی لە سەردانیکەران دەکات.