ئەنجومەنی وەزاری بۆ ئابووری، بە سەرۆکایەتی محەمەد شیاع سوودانی، سەرۆکی ئەنجومەنی وەزیران، کۆبوونەوەیەکی نائاسایی ئەنجام دا و چەندین بڕیاری گرنگی تایبەت بە کەمکردنەوەی خەرجییەکان و بەرزکردنەوەی ئاستی داهاتەکان دەرکرد.
بڕیار و رێنماییە سەرەکییەکان:
١- یەکسانکردن و پێداچوونەوە بە مووچە و داهاتی پۆستە باڵاکان:
• رێنمایی سەرۆک وەزیران: پێداچوونەوەی بەپەلە بە تەرخانکراو و مووچەی سەرۆکایەتییەکان(کۆمار، پەرلەمان، ئەنجومەنی وەزیران) ئەنجام بدرێت
• ئامانج: کارکردن بۆ یەکسانکردنی مووچە و داهاتەکانی هەموو کارمەندانی سەرۆکایەتی کۆمار و سەرۆکایەتی پەرلەمان لەگەڵ کارمەندانی سەرۆکایەتی ئەنجومەنی وەزیران.
2- یەکخستنی پلەی مووچەی گشتی:
• رێنمایی سەرۆک وەزیران: وەزارەتی پلاندانان راسپێردرا بە ئەنجامدانی نوێکردنەوەی پێویست بۆ ئەو راپۆرتەی کە تایبەتە بە یەکخستنی پلەی مووچەی هەموو مووچەخۆرانی دەوڵەت.
3- کەمکردنەوەی خەرجییەکان:
• کەمکردنەوەی داهاتی ناردنە دەرەوە(الإيفاد): ئەنجومەنی وەزاری بۆ ئابووری بڕیاری دا بە کەمکردنەوەی 90% لە تەرخانکراوی ناردنە دەرەوەی فەرمانبەرانی دەوڵەت.
• کەمکردنەوەی خەرجی پڕۆژە: بڕیاردرا بە کەمکردنەوەی رێژەی سەرپەرشتیکردن و چاودێریکردنی پڕۆژە نوێیەکان.
4- سیاسەتی بازرگانی و خۆراک:
• بەرنامەی هاوردەکردنی نیشتمانی: دانان و کاراکردنی بەرنامەیەکی هاوردەکردنی نیشتمانی کە تەنها کاڵا سەرەکییەکان بگرێتەوە.
• پاڵپشتی گەنم: بڕیاردرا بە بەرزکردنەوەی راسپاردەیەک بۆ ئەنجومەنی وەزیران بەمەبەستی پێداچوونەوە بە پاڵپشتییەکانی بەرهەمی گەنم، بە شێوەیەک کە پاڵپشتیی حکومی لە نرخی بۆرسەی جیهانی گەنم بە ڕێژەی 170% مسۆگەر بکات.
• کارتی خۆراک (بەشەخۆراک) و چینە هەژارەکان: وەزیری بازرگانی راسپێردرا بە پێداچوونەوە و چاکسازی کردن لە کارتی خۆراک و ئاراستەکردنی بۆ ئەو کەسانەی کە بەڕاستی شایستەن لە چینە لاوازەکانی کۆمەڵگەدا.
5- داهاتە نانەوتییەکانی هەرێمی کوردستان:
• رێنمایی سەرۆک وەزیران: پێداچوونەوە بکرێت بە شێوازی هەژمارکردنی داهاتە نانەوتییەکانی هەرێمی کوردستان، کە لە ئێستادا بە بڕێکی دیاریکراو دەخرێتە سەر هەژماری وەزارەتی دارایی، بە هەماهەنگی لەگەڵ حکومەتی هەرێمی کوردستان.