ئەمڕۆ وەزارەتی ناوخۆی عێراق گرتنەبەری چەند رێکارێکی خۆپارێزیی بۆ چاودێریکردنی هاوردەکاران و فرۆشیارانی یارییە ئاگرینەکان راگەیاند، هاوكات جەختی لە دانانی پلانێکی ئەمنی کردەوە بۆ رێگریگریکردن لە بەکارهێنانیان لە کاتی ئاهەنگەکانی سەری ساڵدا.
عەقید عەباس بەهادلی، گوتەبێژی وەزارەتی ناوخۆ رایگەیاند: “دیاردەی بەکارهێنانی یارییە ئاگرینەکان و تەقەمەنییەکان لە ناو شارەکاندا، بەتایبەت لە بۆنە و جەژنەکاندا، دیاردەیەکی نا شارستانییە؛ چونکە مەترسی و کاریگەری خراپی هەیە و دەبێتە هۆی برینداربوون و زیانگەیاندن بە هاووڵاتییان.
روونی کردەوه: وەزارەتی ناوخۆ لەڕێگەی بەڕێوەبەرایەتی بەرەنگاربوونەوەی تاوانە رێکخراوەکان، چاودێری وردی هاوردەکار و فرۆشیاران دەکات و بەپێی یاسا سەرپێچیکاران دەستگیر دەکات.
بەهادلی ئاشکرای کرد: رێکارەکانی وەزارەت لەم ساڵەدا بووەتە هۆی دەستگیرکردنی ٢١٨ سەرپێچیکار (هاوردەکار و فرۆشیار) لە بەغدا و پارێزگاکانی تری عێراق، کە رێکاری یاسایی توندیان بەرامبەر گیراوەتە بەر.
راشیگەیاند: وەزارەتی ناوخۆ رێنمایی داوە بە فەرماندەییەکانی پۆلیس بۆ دانانی پلانێکی تۆکمە بە مەبەستی رێگریکردن لەم دیاردەیە لە کاتی ئاهەنگەکانی سەری ساڵی نوێدا.