وەزارەتی ناوخۆی عێراق ئەمڕۆ رایگەیاند کە کارکردن لە بەڕێوەبەرایەتی باری شارستانی، پاسپۆرت و نیشتەجێبوون تاوەکو ٤ـی کانوونی دووەمی ٢٠٢٦ رادەگیرێت.
لە راگەیەندراوێکی وەزارەتی ناوخۆی عێراقدا هاتووە: “بە پشتبەستن بە رێنماییەکانی وەزیری ناوخۆ و بە سەرپەرشتی بەڕێوەبەری گشتی بەڕێوەبەرایەتی باری شارستانی، پاسپۆرت و نیشتەجێبوون بۆ هاوڵاتییان لە بەغدا و سەرجەم پارێزگاکان روونی دەکاتەوە کە کارکردن لە تەواوی فەرمانگەکانی رادەگیرێت، ئەمەش هاوکاتە لەگەڵ کۆتایی هاتنی ساڵی دارایی.”
لە راگەیەندراوەکەدا ئاماژە بەوە دراوە: “راگرتنی کارەکان لە رۆژی یەکشەممە رێکەوتی ٢٨ / ١٢ / ٢٠٢٥ دەست پێدەکات و لە رۆژی یەکشەممە رێکەوتی ٤ / ١ / ٢٠٢٦ دەست بە کارکردن دەکرێتەوە.”
هەروەها هاتووە: “ئەم رێکارە ساڵانەیە بە مەبەستی ئەنجامدانی پرۆسەی ژمێریاری ساڵانە(جەرد)، هاوتاکردنی حیساباتی دارایی و ئامادەکردنی سیستەمە ئەلیکترۆنییەکان و داتاکانە بۆ پێشوازیکردن لە ساڵی نوێ؛ بە ئامانجی دەستەبەرکردنی باشترین خزمەتگوزاری بۆ هاوڵاتییان بە وردی و کاراییەکی بەرز.”