مایکل دۆگلاس، ئەکتەری ناوداری ئەمریکی، ئاشکرای کرد، ڕۆڵە ناوازەکەی لە فیلمی “Wall Street” کە خەڵاتی ئۆسکاری بۆ بەدەستهێنا، لە سەرەتادا ڕووبەڕووی مەترسی ببووەوە.
دۆگلاس دەگێڕێتەوە کە لە هەفتەی دووەمی وێنەگرتندا، دەرهێنەر ئۆلیڤەر ستۆن بە توندی ڕەخنەی لێگرتووە و پێی گوتووە: “وا دەردەکەویت کە هەرگیز لە ژیانتدا نواندنت نەکردبێت”.
ئەم لێدوانە توندەی ستۆن وای لە دۆگلاس کردووە پێداچوونەوە بە کارەکانیدا بکات و زیاتر تێبکۆشێت. دواجار دۆگلاس تێگەیشتووە کە ئەمە شێوازی ستۆن بووە بۆ هاندانی ئەکتەرەکان تا باشترین توانای خۆیان نیشان بدەن.
ئەو کەسایەتی “گۆردۆن جێکۆ”ـی بە شێوەیەکی ئەفسانەیی بەرجەستە کرد و توانی خەڵاتی ئۆسکار و گۆڵدن گڵۆب بباتەوە.
دۆگلاس ئێستا بە سوپاسگوزارییەوە باس لەو ساتە سەختانە دەکات و دەڵێت کە ڕەخنە راشکاوەکەی دەرهێنەر پاڵنەر بووە بۆ ئەوەی ئاستی نواندنەکەی بگەیەنێتە لوتکە و یەکێک لە بەهێزترین کەسایەتییەکانی مێژووی سینەما بخولقێنێت.