بەڕێزان / سکرتێر و ئەندامانی مەکتەبی سکرتاریەتی یەکێتیی قوتابیان و لاوانی دیموکراتی کوردستان..
١٨ـی شوباتی ١٩٥٣ ڕۆژی دامەزراندنی ڕێکخراوی یەکێتی قوتابیان کوردستان و یەکێتی لاوانی دیموکراتی کوردستان، ڕۆژێکی شکۆدار و گەشە لە خەباتی ڕەوای گەلەکەمان. ئەمڕۆ کە ئەو بیرەوەرییە بەرز و شکۆدار ڕادەگرین، یادی کاروانێکی پڕ چالاکی و کار و کردار و کۆڵنەدان دەکەینەوە، یادی دوو توێژی بەهرەمەند و دڵگەرمە لە پێناوی گەیشتن بە ئامانجەکانمان و مافی ڕەوای قوتابیان و لاوان.
دامەزراندنی ئەو ڕێکخراوە تێکۆشەرانە ئەستێرەیەکی هەمیشە درەوشاوەی ئاسمانی بزووتنەوەی ڕزگاریخوازیمان و رێکخراوە جەماوەری و پیشەییەکانە، کە هەر لە دامەزراندنیانەوە یەکەمین سەکۆی ئازادی دەنگی سەرجەم قوتابیان و لاوان بوون.
دامەزراندنی ڕێکخراوی تایبەت بەو دوو توێژە هەنگاوێکی گرنگ و کاریگەر بوو بۆ دابینکردنی ماف و خواست و ویستەکانیان، هەروەها ئەو کاروانە پڕ شکۆیەش شایەتی ئەو خەباتە نەپساوەیە دەدات، کە ئەو ڕێکخراوە بە بەرنامە و پلانی گونجاو خزمەتێکی بەردەوامی تێکڕای قوتابیان و لاوانی کردووە و بۆتە چرای هەمیشە ڕۆشنی زانست و پێشکەوتن و ئەفراندن.
لە لایەکی دیکەوە ئامانج و مافی پیشەیی قوتابیان و لاوان خۆی لەو رێکخراوە سڤیلە دەبینێتەوە، بۆیە لە رێگای ئەو ڕێکخراوە و پەیامەکەی توانیویانە چەندین دەستکەوتی گرنگ بۆ ئەو دوو توێژە بەدی بێنن و بە هەموو شێوەیەک داکۆکی لە مافەکانیان بکەن و هەر ئەو ڕەوتە نەسرەوتووەش قوتابخانەیەک بوو بۆ پەروەردە و پێگەیاندنی دەیان سەرکردە و کادیری لێهاتوو و دڵسۆز.
ڕۆڵ و کاریگەری توێژی قوتابیان و لاوان لە هەموو هەلومەرج و بارودۆخێکدا گرنگ بووە، ئەمڕۆش ئەرکی ئێوە و هەموو چین و توێژەکانی دیکەی گەلەکەمانە بە هەستێکی ڕاستەقینەی نەتەوەیی و نیشتمانپەروەریی ڕۆڵ ببینن بۆ قووڵکردنەوە و پتەوکردنی گیانی بەرپرسیاریەتی و بونیاتنانی داهاتوویەکی ڕۆشن و بەرهەمدار بۆ قوتابیان و لاوان.
یادکردنەوەی ١٨ـی شوباتی ئەمساڵ جیاواز لە ڕابردوو و، دوای دەیانساڵ خەبات و تێکۆشان و بەخششی یەکێتی لاوانی دیموکراتی کوردستان و یەکێتی قوتابیانی کوردستان، هەردوو ڕێکخراو هێز و تواناکانیان تێکەڵ بەیەک کراوە و وەکو یەک ڕێکخراو کە یەکێتی قوتابیان و لاوانی دیموکراتی کوردستانە درێژە بە خەبات و خزمەت دەدەن، هیوادارین بە گوڕ و تینێکی زیاتر و بە بەرنامە و پلانی سەردەمیانە لە خزمەتی هەردوو توێژی کاریگەر و ئازیزی لاوان و قوتابیانی وڵاتەکەماندا بەردەوام بن و خەرمانی کار و بەخششتان زیاتربێ و لە ئاست گۆڕانکاریەکانی قۆناخەکە و چاوەڕوانییەکان دابن.
لە (٧٣)ەمین ساڵیادی دامەزراندی ڕێکخراوە تێکۆشەرەکەتاندا وێڕای پیرۆزبایی گەرممان لە ئێوەی بەڕێز و سەرجەم کادیر و ئەندامانی رێکخراوەکەتان، پشتیوانی بەردەوامی خۆمان بۆ یەکێتی قوتابیان و لاوانی دیموکراتی کوردستان دووپات دەکەینەوە و ئومێدەوارین وەک هەمیشە پێشەنگی خەبات و خزمەت و پێشخستنی کۆمەڵگا بن.
سڵاو لە گیانی پاکی ئەو شەهیدە نەمرانەی لە رێگای سەرفرازی ڕێکخراوەکەتان و مافەڕەواکانی گەلەکەمان گیانی خۆیان بەخشی.
سڵاو لە (٧٣) ساڵ تێکۆشان و خەباتی بەردەوامی ڕێکخراوی یەکێتیی قوتابیان و لاوانی دیموکراتی کوردستان.
مەکتەبی سیاسیی پارتی دیموکراتی کوردستان
١٨ـی شوباتی ٢٠٢٦