ئەکتەری کۆمیدی جیهانی، جیم کاری، بووە جێی سەرنجی میدیاکان و تۆڕە کۆمەڵایەتییەکان کاتێک لەسەر فەرشی سووری ٥١یەمین خولی خەڵاتەکانی “سیزار” لە هۆڵی ئۆڵۆمپیا لە پاریس دەرکەوت.
ئەم بەشداریکردنەی جیم کاری تەنها بۆ ئامادەبوون نەبوو، بەڵکو رێوڕەسمەکە ڕێزێکی تایبەتی لە کاروانە هونەرییە دەوڵەمەندەکەی گرت، بەڵام ئەوەی مشتومڕی زۆری نایەوە، گۆڕانکارییە بەرچاوەکان بوو لە شێوە و ڕووخساریدا.
هەوادارانی ئەم ئەکتەرە لە جیهاندا، لە ڕێگەی پلاتفۆرمە جیاوازەکانەوە تێبینی ئەوەیان کرد کە ڕووخساری جیم کاری گۆڕاوە، ئەمەش بووە هۆی دروستبوونی شەپۆلێک لە گومان لەسەر ئەوەی ئایا نەشتەرگەری جوانکاری ئەنجام داوە یان نا.
هەندێک لە بەکارهێنەران ئاماژەیان بە ناوچەی مل و دەموچاوی دەکرد و بە گاڵتەجاڕییەوە دەیانوت “وەک ئەوە وایە دەمامکێکی پۆشیبێت”. سەرەڕای ئەم قسانە، رێوڕەسمەکە یادەوەریی فیلمە هەرە ناودارەکانی وەک “The Mask” و “Liar Liar” و “Eternal Sunshine of the Spotless Mind”ی زیندوو کردەوە.