وەزارەتی دەرەوەی چین ڕایگەیاند: کاری لەپێشینەی بەپەلە لە دۆسیەی ئێراندا، ڕێگریکردنە لە دەستپێکردنەوەی پێکدادان و پاراستنی ئەو ئاگربەستەیە بە سەختی بەدەست هاتووە.
ئەم وەزارەتخانەیە ڕۆژی چوارشەممە ٢٦ی خاکەلێوە جەختی کردەوە: ئارامی لە ناوچەکەدا جێگیر بکرێت و ئاراستەکە بەرەو چارەسەرە سیاسییەکان ببرێت.
پەکین ڕایگەیاند: ئەم شەڕە لە سەرەتاوە نەدەبوو ڕوو بدات و گوشارێکی قورسی خستووەتە سەر کۆمەڵگەی نێودەوڵەتی.
وەزارەتی دەرەوەی چین لە لایەنە تێوەگلاوەکان داوای کرد پابەندی ئاگربەست بن، ڕێڕەوی دیپلۆماسی درێژە پێ بدەن و بە هەنگاوی کرداری، ڕێگری لە هەڵکشانی گرژییەکان بکەن تاوەکوو سەقامگیری بۆ ناوچەکە بگەڕێتەوە.
پەکین ڕۆژی ڕابردووش سەبارەت بە هەڵکشانی گرژییەکان لە ناوچەکەدا هۆشداریی دا و گەمارۆدانی بەندەرەکانی ئێرانی لە لایەن ئەمریکاوە وەک هەنگاوێکی “مەترسیدار و نابەرپرسانە” وەسف کرد.
