ئەمڕۆ ٥٧ ەمین ساڵیادی بەپارێزگابوونی دهۆکە؛ لە ٢٧ی ئایاری ١٩٦٩دا بە بڕیارێکی فەرمی، دهۆک لە قەزاوە کرا بە پارێزگا.
ڕووبەری دهۆک دەگاتە ١٠,٩٢٧ کیلۆمەتری چوارگۆشە و ١,٧٤٣,٣١٤ کەس تێیدا دەژین. دهۆک ٢٥٪ی ڕووبەری خاکی هەرێمی کوردستان و ٢.٥٪ی خاکی عێراق پێکدەهێنێت.
درێژایی سنووری دهۆک لەگەڵ پارێزگای هەولێر ٢٥٨ کم، لەگەڵ پارێزگای نەینەوا ٢٧٧ کم، لەگەڵ سنووری وڵاتی تورکیا ٢١٦ کم و لەگەڵ وڵاتی سووریاش ٦ کمە.
لە ڕووی ئابوورییەوە، ئێستا حکومەتی هەرێمی کوردستان لەگەڵ چەندین کۆمپانیای بیانی لە بواری جیاجیادا کار دەکات، بەتایبەتی لە بواری نەوتدا کە گەشەکردنێکی باشی بەخۆیەوە بینیوە. هەروەها کوردستان لە ڕێگەی دهۆکەوە هاوسنوورە لەگەڵ وڵاتی تورکیا، لەبەر ئەوە بووەتە شادەمارێکی ئابووری و بازرگانیی گرنگ بۆ تەواوی عێراق.
ڕۆشنبیرانی دهۆک باس لە جوامێری و مەردایەتیی خەڵکی دهۆک، پێکەوەژیان و ئاوەدانیی شارەکە دەکەن، بەتایبەت کە لە کابینەی نۆیەمدا پڕۆژەی گەورە و ستراتیژی لە دهۆک جێبەجێ کراون.