هونەرمەندی بەریتانی رۆد ستیوارت، دوای باری تەندروستیی بە نەخۆشییەکی لەپڕ لە کاتی سازکردنی کۆنسێرتێکدا لە ویلایەتی یوتا لە ئەمریکا، بووە هۆی دروستبوونی دڵەڕاوکێ لە لای هاندەرانی.
ئەو هونەرمەندە ناچار بوو بۆ ماوەیەکی کاتی کۆنسێرتەکە رابگرێت و لە پشتی پەردەوە ئۆکسجین بەکاربهێنێت پێش ئەوەی بگەڕێتەوە بۆ تەواوکردنی نمایشەکەی.
رۆد ستیوارت کە تەمەنی 81 ساڵە، لە کاتی پێشکەشکردنی بەرهەمەکانی لەسەر شانۆ، ماندوێتی پێوە دیار بوو و چەند جارێک چەمایەوە.
دواتر تیمەکەی یارمەتییان دا بۆ ئەوەی بچێتە پشتەوە و ئۆکسجین وەرگرێت. سەرەڕای ئەم ئالنگارییە تەندروستییە، ئەو گەڕایەوە سەر شانۆ و لەبەرامبەر جەماوەرەکەی رایگەیاند، خەریک بوو هۆشی خۆی لەدەست بدات. ئەو هونەرمەندە بەردەوام ورەیەکی بەرزی نیشان دا و بە گاڵتەجاڕی کێشەکەی کەمکردەوە و بە دانیشتنەوە لەسەر کورسی کۆنسێرتەکەی تەواو کرد.
ئەم رووداوە دوای ئەوە دێت کە ناوبراو پێشتر چەند کۆنسێرتێکی لە چوارچێوەی گەشتی هونەری “One Last Time” بەهۆی ئەنفلۆنزا و هەوکردنی کۆئەندامی هەناسە دواخستبوو. تیمەکەی لەو بڕوایەدایە، گەڕانەوەی خێرای بۆ سەر شانۆ نیشانەی پابەندییەتی بە جەماوەرەکەیەوە.