رێبوار حەمەلاو شوانى
مێژوو گەواهیدەرە ڕووبەڕووى بوونەوەى چەندین کۆسپ و ئاستەنگى گەورە و هەوڵى نەیارانى کورد بۆ گۆشەگیرکردنى قەوارەى هەرێمى کوردستان لە ڕووى سیاسى و دیپلۆماسى و ئابوورى و حکوومڕانییەوە ، هونەرێکى گەورە و مێژووییە کە تەنیا بەسەرکردەیەکى بلێمەت و ژیر و دانا دەکرێت ، هەموو ئەو ڕووداوانە لە ماوەى چەند ساڵى رابردوو بەرۆکى هەرێمى کوردستانیان گڕتووە چ لەسەر ئاستى ناوخۆیی و دەرەکى و ئینجا لە نێو هەموو ئەو گێژاو وقەیرانانەدا ، هەنگاونان بەرەو بونیاتنانەوەى خاک ونیشتیمانەکەت و بەکارهێنانى لۆژیکى سیاسى و دیپلۆماسى و بەڕێوەبردن پرسێکى ستراتیژى مەزنە بۆ پارێزگاریکردن لە لە قەوارە و دەستکەوت و مافە دەستوورییەکانى گەلى کورد لە ناوچەیەکى پڕ ململانێ و ئاڵۆزدا
سەردان و دیدارە فەرمییەکانى سەرۆکى حکوومەتى کوردستان مەسروور بارزانى چ لەسەر ئاستى ناوچەکە و چ لە سەر ئاستى نێودەوڵەتیی و بەتایبەت ئێستاى بۆ بەغدا تەنها لە چوارچێوەى دیدار و کۆبوونەوەى بەردەم میدیاکان و دوو حکوومەت نییە ؛ بەڵکو ئاماژەیە بۆ ئەو ستراتیژەى بارزانى بۆ پارێزگاریکردن لە قەوارەى کوردستان و ئینجا هاندانى دەسەڵاتدارانى بەغدا بۆ پابەندبوون بە دەستوور و بنەماکانى فیدڕاڵى و لاپەرەیەکى نوێی پەیوەندییەکانى هەرێمى کوردستان و عێراقى فیدڕاڵى کە ساڵانێکى زۆرە گرژى و ئاڵۆزى زۆرى تێکەوتووە
ئەو جۆرە ستراتیژى و دیپلۆماسییەى هەرێمى کوردستان لەکاتێکدایە ، ناوچەکە و عێراق بەشێوەیەکى گشتى بە قۆناغێکى زۆر هەستیاردا تێدەپەڕێت ، بەتایبەت کە ساڵانێکى زۆرە دەسەڵاتى بەغدا بەهۆى دەیان گروپى میلیشیا کە ئێستا زۆربەیان لە نێو لیستى تیرۆر و سزا نێودەوڵەتییەکاندان تووشى کێشە وئاڵۆزى زۆر بووتەوە ، بۆیە ، لێرەدا جگە لەوەى هەنگاوى سەرۆکى حکوومەت بۆ نوێیکردنەوەى پەیوەندییەکانە لە هەمانکاتیشدا ، هەوڵێک بۆ دوورخستنەوەى عێراق لە مەترسیەکانى شەڕ و ئاڵۆزییەکانى ناوچەکەیە
هەنگاوەکى سەرۆکى حکومەتى کوردستان ، بۆ خوێندنەوەى وردبینانەیان بۆ گرژى و ناسەقامگیرى ناوچەیەکە ، چ لە ڕووى قەیرانى وزە و دارایی و ئینجا هاوسەنگى هێزە لە عێراقدا ، لەو نێوەشدا ، هەرێمى کوردستان بە گڕتنەبەرى سیاسەت و دیپلۆماسییەتێکى ژیرانە ، لەلایە کار بۆ ئارامکردنەوەى رەوشى سیاسى و لەلایەک دیکەش هەنگاوەکانى بۆ پارێزگاریکردنە لە بەرژوەندییە ستراتیژییەکانە . هەموو ئەم راستییانە وایکردووە کە عێراق بە چاوێکى زۆر پربایەخ و گرنەوە بڕوانێتە هەرێمى کوردستان و سیاسەت و بەڕێوەبردن ، ئینجا سوود لە ئەزموون و هەموو ئەو بوژاندنەوە بازرگانى و وەبەرهێنانە بەتایبەت لەبوارى وزە و ئەزموونى سەرکەوتووانەى ئابوورى کوردستان وەربگرێت
سەردانى مەسروور بارزانى ، لە قۆناغێکى زۆر گرنگدایە ، بۆ چەندین پرس و دۆسییەى گرنگ ، بەتایبەت بودجە و مووچەى خەڵکى کوردستان و ئینجا پرسى هەناردەکردنى نەوت و هەماهەنگى لەبوارى دارایی ، هەموو ئەمانە لەکاتێکدایە کە گۆڕانکارى نوێى بەهۆى حکوومەتى نوێیی عێراق هاتوونەتە ئاراوە ، لە هەمان کاتیشدا ئە سەردانە سەر لەنوێ لێکتێگەیشتنى هاوبەش و لەبوارەکانى دارایی و ئەمنى و وزە بەتایبەتى نەوت و غاز دێنتێە ئاراوە . لەماوەى چەند ساڵى رابردوو حکوومەتى کوردستان بە سەرۆکایەتى مەسروور بارزانى بە ستراتیژى هێورى و هێزى نەرم گشت هەوڵەکانى خستۆتە گەڕ بۆ چارەسەرى کێشە و پرسە هەلواسراوەکان لەگەڵ دەسەڵاتدارانى بەغدا ،ئەمە وێراى هەموو ئەو گوشارە سیاسییانەى کە بەهۆى سیاسەتەکانى بەغداوە لە رابردوو ، بۆیە ، مێژوو سەلماندوێتى بە بێ گەڕانەوەى متمانە و بەرژوەندى هاوبەش و ڕەچاوگرتنى هاوکارییە ئابوورییەکان وەک ڕێگەچارەسەرییەک بۆ چەسپاندنى مافە دەستوورییەکان و پابەند بوون بە بنەماکانى فیدڕاڵى و ڕێزگرتن لە قەواەرى هەرێى کوردستان لە ڕووى بەڕێوەبردن و ئابوورییدا
سیاسەت وستراتیژى سەرکردایەتیی سیاسى کوردستان و بەتایبەتى سەرۆکى حکوومەتى کوردستان لە رابردوو و ئێستاشدا ، گڕتنەبەرى سیاسەتێکى هاوسەنگییە لە پێناو پارێزگاریکردن لە قەوارەى هەرێى کوردستان و داکۆکیکردن لە لە مافە دەستوورییەکانى گەلى کورد و سەر لەنوێ بەهێزکردنى پەیوەندییەکان لەگەڵ بەغدا ، لە هەمان کاتیشدا عێراق لە دۆخێکى خراپى ئەمنى و ئابوورى و سەقامگیریی دایە ، بۆیە تەنها ڕێگە بەهێزکردنى پەیوەندییەکانە لەگەڵ هەرێمى کوردستان و خۆ دوورخستنەوەیە لە سیاسەتى پەراوێزخستن لە ڕێگەى فشارى سیاسى و ئەمنى و ئابووریی، بۆیە دەسەڵاتدارانى بەغدا ، دەتوانن سوود لە ئەزموون و سیاسەتى بەرێوەبردنى هەرێمى کوردستان وەربگرن وەک هاوبەشێکى ئابوورى و لە هەمانکاتیشدا کاتى ئەوە هاتووە ، بەغدا دڵنییاییەک دروست بکات سەبارەت بە پرسى نەوت و هەناردەکردنى و ئینجا لە ڕووى داراییەشەوە پارێزگارى لەمافەکانى خەڵکى کوردستان بکات ، بەتایبەتى پرسى مووچەى خەڵکى کوردستان کە ساڵانێکى زۆرە حکوومەتە یەک لەدواى یەکەکانى وەک کارتێک دژى خەڵکى کوردستان بەکارى دێنن
بەدڵنییاییەوە ، سەردانە فەرمییەکەى سەرۆکى حکوومەتى کوردستان مەسرووبارزانى ، ئاماژەیەکى روونە بۆ ئەو راستییەى پەیوەندییەکانى هەرێمى کوردستان و عێراقى فیدڕاڵى چوونەتە قۆناغێکى نوێی بۆ کۆتایی هێنان بە کێشە وئاستەنگەکان ، کە ئەمەش خۆى لەخۆیدا سیاسەت ودیپلۆماسییەتێکى ژیرانەیە لە پێناو پارێزگاریکردن لە قەوارەى هەرێمى کوردستان و پارێزگاریکردن لە بەدەستهێنانى ماف و شایستە دەستوورییەکانى گەلى کورد ، ئەوەش سەرکەوتنى هێزى نەرم و ڕاگڕتنى هاوسەنگییە لە نێو قەیران و ئاڵۆزییەکانى ناوچەکەدا ، لە پێناو کوردستانێکى بەهێزتر و گەشەسەندووتر .