کتێبی “هەورامان لە بەردەم هێرش و پەلاماری قاجار و پەهلەویدا” لە وەرگێڕان و ئامادەکردنی حەمەی حەمەسەعید، وەزیری رۆشنبیری و لاوانی حکومەتی هەرێمی کوردستان و بەهاری عەلی مورادی، لە رێوڕەسمێکدا بە ئامادەبوونی ژمارەیەکی بەرچاو لە کەسایەتی و رۆشنبیر و نووسەران لە هۆڵی تەوار لە شاری سلێمانی ناسێندرا.
رێوڕەسمەکە لە ناوەندی چاپەمەنی و رۆشنبیری کارۆ، بۆ ئامادەکار و وەرگێڕی کتێبەکە رێکیخستبوو.
حەمەی حەمەسەعید، وەک وەرگێڕی کتێبەکە، لە وتەیەکدا باسی لە ناوەڕۆکی ئەو بەرهەمە چاپکراوەی کرد و گوتی: کتێبەکە دوو بەشی بەسەرەکییە و باس لەو هێرش و پەلامارانە دەکات، کە لە سەردەمی دەسەڵاتی قاجار و دواتریش دەسەڵاتی پەهلەویدا کراونەتە سەر سەرزەمینی هەورامانات.
گوتیشی: هەورامان سەرزەمینێکی دێرینی مێژووییە و دەکەوێتە ناوەندی کوردستان و زنجیرە چیای زاگرۆس بە هەوراماندا تێدەپەڕێت و لە رووی فەرهەنگی و کولتوورییەوە ناوچەیەکی دەوڵەمەندە و یونسکۆ وەک ناوچەیەکی کولتووری و میراتێکی مێژووی مرۆڤایەتی تۆماری کردووە.
باسی لە جوگرافیای هەورامان کرد و گوتی: هەورامان پێنج بەشە و پێی دەوترێت هەورامانی شامیان، ژاوەرۆ، رەزاو، هەورامانی تەخت و دزڵی، هەورامانی لهۆن و لە مێژوودا ئەم بەشانەی هەورامان هەوڵیانداوە بەردەوام خاوەنی دەسەڵاتی خۆماڵی و خۆجێی بن و نەکەونە ژێر کاریگەری دەرەکییەوە.
گوتیشی: فەرمانڕەواکانی هەورامان، بە تایبەتی سانەکان، کە رووبەڕووی ستەم و هێرشی قاجار و پەهلەوی بوونەتەوە، لە کاتی شەڕدا دوژمن شکستی پێنەهێناون و لە کاتی میوانداریدا دەستیان لێ وەشێندراوە و کوژراون.
لە بارەی جافرسانەوە، کە فەرمانڕەوای هەورامانات بووە و شانبەشانی مەحمودخانی دزڵی، یەکێک بووە لە پشتیوانەکانی شۆڕشی شێخ مەحموود لە سلێمانی، حەمەی حەمەسەعید گوتی: ماوەی دەسەڵاتدارێتی جافرسوڵتان جیاواز بووە لە ماوەکانی دیکە و هەندێکجار تیرەکانی جاف هاوکاریان کردووە و لە 1931دا سوپای پەهلەوی هێرشیکردووەتە سەر.
روونیشیکردەوە، لەو سەردەمەدا، سانەکان داخوازی نەتەوەییان نەخستووەتەڕوو، زۆرتر شەڕیان بۆ پاراستنی پێگەی بەڕێوبردن و دەسەڵاتی خۆیان کردووە.