ئەمڕۆ چوارشەممە، 1ی تەممووزی 2026، لەگەڵ بەردەوامیی مامەڵەکان لە بازاڕەکانی وزەدا، نرخەکانی نەوت لەسەر ئاستە بەرزەکانیان مانەوە و جۆرێک لە جێگیربوون و هەڵکشانی نوێیان بەخۆوە بینی، ئەمەش لە کاتێکدایە کە بازاڕەکان هێشتا لەژێر کاریگەریی پێشهاتە سیاسییە نوێیەکانی نێوان واشنتن و تارانداندابوون.
ئەم جووڵە نوێیەی بازاڕ دوای ئەوە دێت کە ئامادەنەبوونی ئێران بۆ کۆبوونەوەی ڕاستەوخۆ لەگەڵ بەرپرسانی ئەمریکا، بووەتە هۆی دروستبوونی کەشێکی چاوەڕوانی و دڵەڕاوکێ لە لای بازرگانان، ئەمەش ڕاستەوخۆ نرخی نەوتی لە بازاڕەکانی جیهاندا بەرزکردەوە.
لە گۆڕانکارییەکانی ئەمڕۆی بازاڕدا، نرخی هەر بەرمیلێک نەوتی خاوی برێنت ڕووی لە هەڵکشان کرد و گەیشتە 73.08 دۆلار، کە بەراورد بە ئامارەکانی دوێنێ (72.26 دۆلار) بە بڕی 0.82 دۆلار بەرزبووەتەوە. هاوكات، نرخی هەر بەرمیلێک نەوتی خاوی سووکی تەکساسی ئەمریکی پاشەکشەیەکی کەمی بەخۆوە بینی و نیشتەوە سەر 69.62 دۆلار، کە بەراورد بە دواین ئاماری تۆمارکراو (70.22 دۆلار) دابەزینێکی 0.60 دۆلاری نیشان دەدات.
ئەم جووڵە جیاوازەی نێوان هەردوو خاوەکە پێشان دەدات کە بازاڕی نەوتی جیهانی (برێنت) زیاتر کەوتووەتە ژێر کاریگەریی ڕاستەوخۆی نادڵنیاییە سیاسییەکانەوە، و کەمبوونەوەی هیواکانی دیالۆگی خێرا وایکردووە کە مامەڵەکان بە جۆرێک لە پارێزگاری و چاوەڕوانییەوە بەڕێوەبچن.