ڕێکخراوی نێودەوڵەتیی کار هۆشداریی دا شەڕی ڕۆژهەڵاتی نێوەڕاست لە ساڵانی ٢٠٢٦ و ٢٠٢٧دا دەبێتە هۆی لەناوچوونی ملیۆنان هەلی کار لە جیهاندا و کرێی ڕاستەقینەی کارمەندانیش کەمی کردووە.
ئەم دامەزراوەیەی سەر بە نەتەوە یەکگرتووەکان ڕایگەیاند لێکەوتەکانی ئەم تەنگژەیە زۆر لە ناوچەی ململانێکان زیاتر دەبێت. ڕێکخراوەکە لە ڕاپۆرتێکدا ئاماژەی بەوە دا بەرزبوونەوەی نرخی وزە، کێشەی گواستنەوە، گوشار لەسەر زنجیرەی دابینکردن و کەمبوونەوەی گەشتیاری کاریگەریی نەرێنییان لەسەر ئابووریی وڵاتان دروست کردووە.
ڕێکخراوی نێودەوڵەتیی کار پێشبینی دەکات ئەگەر نرخی نەوت بە ڕێژەی ٥٠٪ لە سەرووی تێکڕای پێش دەستپێکی هێرشەکانی ئەمریکا و ئیسرائیل بۆ سەر ئێران بمێنێتەوە، ڕێژەی بێکاریی جیهانی لە ساڵی ٢٠٢٧دا بە ڕێژەی ٥.٠٪ زیاد دەکات. هەروەها هۆشداریی دا وڵاتانی ڕۆژهەڵاتی نێوەڕاست و کەنداو و ناوچەی ئاسیا-ئوقیانوسیا زۆرترین زیانیان بەردەکەوێت و لێکەوتە ئابوورییەکانی ئەم شەڕە لە پەتای کۆرۆناش سەختتر دەبێت.
