درێژبوونی قژی مرۆڤ بێسنوور نییە، بەڵکو لە لایەن “کاتژمێرێکی جینیی” پەرەسەندووەوە بە وردی کۆنتڕۆڵ دەکرێت.
بەپێی هەواڵێکی ماڵپەڕی”forbes”، هەر ڕەگێکی قژ بە سێ قۆناغی سەرەکیدا تێدەپەڕێت کە بریتین لە قۆناغی گەشەکردن(anagen)، گواستنەوە (catagen) و پشوودان(telogen).
درێژترین ئاست کە قژی سەر، قۆڵ یان برۆ و برژانگەکان پێی دەگەن، پەیوەستە بەو ماوە زەمەنییەی کە بۆ قۆناغی یەکەم (گەشەکردن) لە ڕووی جینییەوە دیاریکراوە، نەک بە خێرایی گەشەکردنی تاڵە قژەکە.
ئەم سیستمە بایۆلۆژییە ئاڵۆزە ڕێگری دەکات لە گەشەی بێپێشینە و بەردەوامی قژ کە لە ڕووی مێتابۆلیزمەوە وزەیەکی زۆر لە جەستە دەبات و لە ڕووی کرداریشەوە بێسوودە، بەمەش دڵنیایی دەدات کە مووەکانی جەستە تەنها ئەرکە سەرەکییەکانی خۆیان وەک پاراستن و گەرم ڕاگرتن جێبەجێ دەکەن.
هەرچەندە ماوەی قۆناغی گەشەکردن تا ڕادەیەکی زۆر بۆماوەییە، بەڵام هۆکارەکانی وەک خۆراک، سترێس و هۆرمۆنەکان کاریگەریی گەورەیان لەسەر تەندروستی و هەڵوەرینی قژ هەیە، بە تایبەت هۆرمۆنی ئەندرۆجین کە دەبێتە هۆی کورتکردنەوەی قۆناغی گەشەکردنی قژی سەر.