شارەزایەکی بواری کەشناسی هۆشداری لە هاتنی شەپۆلێکی خۆڵبارین دەدات کە ناوچەکانی عێراق و هەرێمی کوردستان دەگرێتەوە و ڕایدەگەیەنێت، بەهۆی چڕی شەپۆلەکە مەودای بینین کەمدەبێتەوە.
هەڤاڵ سدیق گەڵۆزی، شارەزای کەشناسی بلاویکردوتەوە؛ بەهۆی چالاکبوونی بای باشووری خۆرئاوا و زیادبوونی خێرایی با لە ناوچەکانی بادیەی شام و ئەردەن، شەپۆلێکی خۆڵبارینی مامناوەند بۆ چڕ ڕوو لە ناوچەکە دەکات و کاریگەریی ڕاستەوخۆی لەسەر عێراق و هەرێمی کوردستان دەبێت.
سەبارەت بە کاتی دەستپێکردنی شەپۆلەکە، ئەو شارەزایەی کەشناسی ئاماژەی بەوە کرد، لە ئێوارەی سبەی یەکشەممە (٢٠٢٦/٥/٣) شەپۆلەکە دەست پێدەکات و تەواوی ناوچەکانی ڕۆژئاوا و ناوەڕاستی عێراق بە چڕی دەگرێتەوە.
کاریگەریی شەپۆلەکە لەسەر ناوچەکانی هەرێمی کوردستان:
بەپێی پێشبینییەکان، کاریگەریی ئەم شەپۆلە لەسەر هەرێمی کوردستان بەم شێوەیە دەبێت:
پارێزگاکانی (هەولێر، دهۆک، کەرکوک) و ئیدارەی گەرمیان: خۆڵبارینێکی سووک بۆ مامناوەند دەبێت.
ڕۆژی دووشەممە: لە ناوچە شاخاوییەکانی (سلێمانی، ڕاپەڕین، سۆران و دهۆک) ئەگەری دروستبوونی تەپوتۆزی ناوخۆیی هەیە.
تەندروستی و هاتوچۆ هۆشداری دەدەن:
بەهۆی کەمبوونەوەی مەودای بینین و کاریگەرییە تەندروستییەکانی ئەم شەپۆلە، داوا لە هاووڵاتییان دەکرێت ڕەچاوی ئەم خاڵانە بکەن:
١. بۆ شۆفێران: لەکاتی لێخوڕین لەسەر ڕێگا دەرەکییەکان، پێویستە بەوپەڕی وریاییەوە مامەڵە لەگەڵ دۆخەکە بکەن و خێرایی لێخوڕین کەم بکەنەوە.
٢. بۆ نەخۆشانی هەناسە: ئەو کەسانەی نەخۆشی ڕەبۆ و کۆئەندامی هەناسەیان هەیە، پێویستە دەمامک بەکاربهێنن و تا دەکرێت لە ماڵەکانیان نەیەنە دەرەوە بۆ پاراستنی تەندروستییان.