لیژنەی دارایی لە ئەنجومەنی نوێنەرانی عێراق، ئەمڕۆ دووشەممە ڕایگەیاند کە پڕۆژەیاسای “قەرزکردن، بەخشین و هاوکارییەکان”یان لەگەڵ فالح ساری، وەزیری دارایی تاوتوێ کردووە. لیژنەکە دووپاتی کردەوە کە ئەم یاسایە دەبێتە جێگرەوەی یاسای بودجەی گشتیی ساڵی ٢٠٢٦ و ئامادەکاری دەکرێت بۆ خستنەبەسی بەرنامەی کاری دانیشتنەکانی پەرلەمان.
عودەی عەواد، سەرۆکی لیژنەی دارایی پەرلەمانی عێراق به شەفەقی نیوزی ڕایگەیاند کە یاسای قەرزکردن دەبێتە جێگرەوەی یاسای بودجەی ٢٠٢٦، و لیژنەکە بە زۆرینەی دەنگ بڕیاریداوە پڕۆژەکە بخاتە ناو بەرنامەی کاری دانیشتنەکانی داهاتووی پەرلەمانەوە بە مەبەستی گەورەکردنی داهاتی گشتی و پاڵپشتیکردنی گەنجینەی دەوڵەت.
راشیگەیاند: یاساکە میکانیزمەکانی قەرزکردنی ناوخۆیی و دەرەکی لەخۆدەگرێت، بەبێ ئەوەی بڕە پارەیەک دیاریکراو بۆ قەرزەکان دەستنیشان بکات.
عەواد ئاشکرای کرد: پڕۆژەیاساکە دەسەڵاتی دیاریکراو بە هەر وەزیرێک دەدات سەبارەت بە خەرجییەکان، لە پاڵ چەند دەسەڵاتێکی تر کە بەپێی یاساکە دەبەخشرێنە ئەنجومەنی وەزیران.
روونیشی کردەوه: لیژنەی دارایی لە هەوڵدایە بۆ تاوتوێکردنی ئەگەری جیاکردنەوەی سەرەمووچە (علاوات) و بەرزکردنەوەی پلەی (ترفيعات) فەرمانبەرانی دەوڵەت لە یاسای بودجەدا.
لەلایەکی دیکەوه حوسێن دەڕاجی، ئەندامی لیژنەی دارایی ئاشکرای کرد کە دەسەڵاتی یاسادانان و جێبەجێکردن بە نیازن لە ساڵی داهاتووەوە (٢٠٢٧) بە شێوەیەکی قۆناغ بە قۆناغ بەرەو جێبەجێکردنی “بودجەی بەرنامەکان و کارامەیی” هەنگاو بنێن، بە مەبەستی ڕێکخستنی خەرجییەکان و پاراستنی سامانی گشتی.