وەزارەتی نەوتی عێراق: ڕاکێشانی بۆری غاز بۆ ماڵان یەکێکە لە پڕۆژە پێشنیارکراوەکانمان

وەزارەتی نەوت ئەمڕۆ ڕایگەیاند کە ڕاکێشانی بۆری غاز بۆ ماڵان یەکێکە لە پڕۆژە پێشنیارکراوەکان، هاوکات ئاماژەی بەوە کرد کە پڕۆژەکە پێویستی بە بودجەیەکی زۆر و ماوەیەکی زەمەنی هەیە بۆ جێبەجێکردن.
سائیب بەزوون، وتەبێژی وەزارەتی نەوت ڕایگەیاند: “ڕاکێشانی بۆری غاز بۆ کۆمەڵگەکانی نیشتەجێبوون و خانوو کارێکی ستراتیژی گەورەیە و پێویستی بە پارەیەکی زۆر و کات هەیە بۆ جێبەجێکردن،” جەختیشی کردەوە کە “جێبەجێکردنی ئەم پڕۆژەیە ڕەنج و ماندووبوونێکی زۆر کەم دەکاتەوە و ڕێگری لە بەفیڕۆدانی ئەم ماددە گرنگە دەکات.”
تەواوی کرد و وتی: “پڕۆژەکانی ڕاکێشانی بۆری غاز لە کۆمەڵگەکانی نیشتەجێبوون لە بەغدای پایتەخت و پارێزگاکان، لە کارە لەپێشینەکانی وەزارەتن، چونکە گرنگییەکی زۆریان لە گێڕانەوەی بڕێکی زۆر پارەدا هەیە،” ئاماژەی بەوەش کرد کە “وەزارەت لێکۆڵینەوەی لەسەر بابەتەکە هەیە، بەڵام پێویستی بە دابینکردنی بودجەی پێویستە بۆ دەستپێکردنی.”