“هاوپەیمانێتی عەقدی وەتەنی” و “بزووتنەوەی سومەرییون”، لەگەڵ ژمارەیەک پەرلەمانتاری تری جیابووەوە لە هاوپەیمانێتی “ئاوەدانکردنەوە و گەشەپێدان” (الإعمار والتنمية) کە محەمەد شیاع سوودانی سەرۆکایەتی دەکات، ڕۆژی چوارشەممە، پێکهێنانی “هاوپەیمانێتی بەیانی نیشتمانی”یان ڕاگەیاند، و جەختیان لەسەر پشتگیریکردنی حکومەت و یەکڕیزیی چوارچێوەی هەماهەنگی کردەوە.
لە بەیاننامەیەکی هاوپەیمانێتییە نوێیەکەدا هاتووە کە هێزە واژۆکەرەکان، دوای لێکۆڵینەوە لە گۆڕەپانی سیاسیی عێراق و پێداویستییەکانی کاری سیاسی و هەماهەنگی لەگەڵ هێزە سیاسییە نیشتمانییەکاندا، بڕیاریاندا بە ڕاگەیاندنی پێکهێنانی هاوپەیمانێتییە نوێیەکە.
بەیاننامەکە زیادیشی کردووە، کە “هاوپەیمانێتییەکە بەردەوامبوون لەسەر پشتگیریکردنی حکومەت و پشتگیریکردنی یەکڕیزیی چوارچێوەی هەماهەنگی، و دەستگرتن بە نەگۆڕە نیشتمانی و شەرعییەکان کە لە تەواوی هەڵوێستە سیاسییەکانماندا لێیانەوە بەڕێ دەکەوین، دەگرێتە ئەستۆ”.
بەپێی بەیاننامەکە، هاوپەیمانێتییەکە ئاماژەی بە پەرۆشیی خۆی کردووە بۆ “پاراستنی سەروەریی نیشتمانی و سەربەخۆیی بڕیاری نیشتمانی و پشتگیریکردنی دامەزراوەکانی دەوڵەت، و وەستانەوە لە دژی هەر هەوڵێک بۆ لاوازکردنیان یان دەستبەرداربوون لێیان”.
پێش چەند ڕۆژێکی کەم، پەرلەمانتار عەلی ئەنهێر سەرای، کشانەوەی خۆی لە کوتلەی “ئاوەدانکردنەوە و گەشەپێدان” ڕاگەیاندبوو، و جەختی لەسەر بەردەوامبوونی لە کارکردن وەک پەرلەمانتارێکی سەربەخۆ لە ناو ئەنجومەنی نوێنەراندا کردبووەوە.
