کاتژمێر 8:00ـی سەر لەبەیانیی ئەمڕۆ یەکشەممە (16ی ئابی 2026)، لە ژێر چاودێریی ئەندازیار کارزان عەبدولهادی، سەرۆکی شارەوانیی هەولێر، و بە ئامادەبوونی بەڕێوەبەرانی شارەوانی، سەرپەرشتیار و ژمارەیەک لە بەرپرسانی حزبیی سنوورەکەو سەرۆک بەش و ئەندازیاران، هەڵمەتی فراوانی چاندنی (16 هەزار) دار لە شاری هەولێر ڕاگەیاندرا.
وەک قۆناغی یەکەمی ئەم هەڵمەتە، لەسەر شەقامێکی دوو سایدی گەڕەکی فەرمانبەرانی هەولێر، دەستیپێکرد و سەدان نەمام لە جۆری دارسیسەم چێندران.
هاوکات سەرۆکایەتیی شارەوانیی هەولێر لە ڕێگەی بەڕێوەبەرایەتیی ئەندازەی پارکەکان، قۆناغەکانی دیکەی دارچاندن لە سەرتاسەری شارەکە فراوانتر دەکات؛ ئەوەش بە ئامانجی ڕەخساندنی ژینگەیەکی سروشتیی پاک و هەروەها پەرەپێدان و بەرزکردنەوەی ڕێژەی سەوزایی لە پایتەختی هەرێمی کوردستان.