بەڕێوەبەرایەتیی گشتیی کەشناسی و بومەلەرزەزانیی هەرێمی کوردستان، پێشبینیی کەشوهەوای ئەمڕۆ و سبەینێی بڵاوکردەوە و ئاماژەی بە گۆڕانکارییەکان لە کەشوهەوای ناوچەکانی هەرێم کرد.
بەپێی پێشبینییەکان، ئەمڕۆ یەکشەممە، 30ی ئابی 2026، ئاسمان لە زۆربەی ناوچەکان نیمچەهەور دەبێت و لە هەندێک شوێن هەوری زیاتر دەبینرێت. هەروەها ئەگەری نمەباران لە ناوچە جیاوازەکان هەیە، بە تایبەتی لە ناوچە شاخاوییە سنووری و بەرزەکان کە ئەگەری هەورە تریشقە و نمەبارانیشیان بۆ پێشبینی کراوە.
کەشناسی هەروەها ڕایدەگەیەنێت کە خێرایی با لە سنووری پارێزگاکانی سلێمانی و هەڵەبجە و ئیدارەی گەرمیان زیاد دەبێت و لە هەندێک کاتدا دەتوانێت خێراییەکەی بگاتە سەرووی 25 کیلۆمەتر لە کاتژمێرێکدا. لە هەمان کاتدا، پلەکانی گەرما بە بەراورد بە ڕۆژی پێشوو نزیکەی 1 تا 2 پلەی سیلیزی دادەبەزن.
بەڵام بۆ سبەینێ دووشەممە، 31ی ئابی 2026، پێشبینی دەکرێت کەشوهەوا زیاتر ئارام بێت و ئاسمان ساماڵ تا پەڵەهەور بێت. هاتنی بارستە هەوایەکی فێنک دەبێتە هۆی دابەزینی پلەکانی گەرما بە نزیکەی 3 تا 5 پلەی سیلیزی.
لە ڕۆژی دووشەممەدا، بەرزترین پلەی گەرما لە هەولێر 37 پلە، سلێمانی 36 پلە، دهۆک 36 پلە، هەڵەبجە 38 پلە و لە گەرمیان 42 پلەی سیلیزی پێشبینی کراوە.
لە بەرامبەردا، حاجی ئۆمەران بە فێنکترین ناوچەی هەرێم دادەنرێت و پلەی گەرمای لە سبەینێدا دەگاتە 26 پلەی سیلیزی.