“بۆ هەموو شتێک سەردەمێک هەیە، بۆ هەر کارێکیش لە ژێر ئاسماندا کاتێک هەیە” (کۆچەر ٣: ١)
بە شادییەکی گەورە لە شانازی و بە باوەڕێکی نەگۆڕ کە لە قووڵایی مێژوو و ئومێددا ڕەگی داکوتاوە، هاوپەیمانیی مەسیحی لە عێراق و هەرێمی کوردستان، گەرمترین پیرۆزبایی ئاڕاستەی ڕۆڵەکانی گەلە ڕەسەن و بەڕێزەکەمان لە نیشتمان و تاراوگە دەکات، بە بۆنەی هاتنەوەی جەژنی ئەکیتۆ؛ سەری ساڵی بابلیی کلدانی (7326) و بابلیی ئاشووری (6776). ئەم جەژنەی کە گوزارشت لە بەردەوامیی ژیان، نوێبوونەوەی سروشت و سەرکەوتنی ڕووناکی بەسەر تاریکیدا دەکات لە بەرەبەیانی شارستانییەتەوە.
ئەکیتۆ تەنها ئاهەنگێکی ساڵانە نییە، بەڵکو ڕاگەیاندنێکی زیندووی ناسنامەیەکی شارستانییە کە مێژووەکەی بۆ قووڵایی کات دەگەڕێتەوە؛ ڕەگ و ڕیشەی لە سۆمەر، ئەکەد، بابل، ئاشوور و ئارام داکوتاوە. لەوێدا باپیرانمان یەکەمین لاپەڕەکانی مێژووی مرۆڤایەتییان نووسییەوە و بناغەی شارستانییەت، نووسین، یاسا، ماتماتیک، گەردوونناسی و کارگێڕییان دانا. لەم خاکە پیرۆزەوە، خاکی میزۆپۆتامیا (بێث نەهرێن)، پەیامی مرۆڤ بەرەو ئاودانی و زانست و باوەڕ دەستی پێکرد.
ئێمە لە هاوپەیمانیی مەسیحی، کاتێک یادی ئەم بۆنە مەزنە دەکەینەوە، جەخت دەکەینەوە کە ناسنامەی نەتەوەیی و شارستانیمان تەنها میراتێکی مێژوویی نییە، بەڵکو بەرپرسیارێتییەکی ئێستا و ئەرکێکی نیشتمانی و ئەخلاقییە؛ داوامان لێدەکات هەموومان لە پەراوێزخستن و لەناوچوون بیپارێزین، هەروەها کار بکەین بۆ بەهێزکردنی پێگەی لە دامەزراوەکانی دەوڵەت و لە ژیانی سیاسی، ڕۆشنبیری و کۆمەڵایەتیدا.
هەروەها دووپاتی دەکەینەوە کە کاروانی ئێمە لە هاوپەیمانیی مەسیحی، لە بەهاکانی باوەڕی کریستیانی ڕەسەنمانەوە سەرچاوە دەگرێت، کە لەسەر بنەمای خۆشەویستی، دادپەروەری، ئاشتی و کەرامەتی مرۆڤایەتی دامزراوە. وەک چۆن یەسوعی مەسیح (شکۆمەندی بۆ ناوی) دەفەرموێت:
“خۆزگەی بۆ ئەوانەی ئاشتی دەخوڵقێنن، چونکە بە ڕۆڵەی خودا ناودەبرێن” (مەتتا ٥: ٩)
ئێمە بڕوامان وایە پەیامەکەمان لە سنووری سیاسەتی موجەرەد تێدەپەڕێت بۆ پەیامێکی مرۆیی و ئەخلاقی کە هەوڵی چەسپاندنی پێکەوەژیان و بنیادنانی کۆمەڵگەیەک دەدات کە هەمووان بێ جیاکاری لەخۆ بگرێت و مافی هەموو پێکهاتە نەتەوەیی و ئاینییەکان بپارێزێت.
ئێمە جەژنی ئەکیتۆ وەک سیمبولی یەکگرتوویی و نوێبوونەوە دەبینین، و دەرفەتێکە بۆ نوێکردنەوەی پەیمان لەگەڵ گەلەکەمان کە وەک دەنگێکی داکۆکیکار لە مافەکانی، پاسەوانێک بۆ ناسنامەکەی و شەريكێکی کارا لە بنیادنانی عێراقێکی فیدراڵی دادپەروەر بمێنینەوە؛ بە پابەندبوون بە جێبەجێکردنی دەستوور بەبێ بژاردەیی، و هەرێمی کوردستانی سەقامگیر، گەشەسەندوو و ئارام کە باوەش بۆ هەموو ڕۆڵەکانی بکاتەوە و ببێتە نموونەیەکی ڕاستەقینەی فرەیی، پێکەوەژیان .
لە دەرفەتی ئەم بۆنە پیرۆزەدا، داوا لە ڕۆڵەکانی گەلەکەمان لە هەر شوێنێک بن دەکەین کە دەست بە ڕەگ و ڕیشەی خۆیانەوە بگرن، زمان و کولتووری خۆیان بەهێز بکەن و ئەم میراتە مەزنە بۆ نەوەکانی داهاتوو بگوازنەوە. هەروەها داوا دەکەین ڕیز و گوتارمان یەکبخەین، و دەرگاکانی هاوپەیمانیی مەسیحی بە کراوەیی دەمێننەوە بۆ هەموو هێزە سیاسییەکان، دامەزراوە مەدەنییەکان و کەسایەتییە سیاسی و ئەکادیمییەکانی گەلەکەمان بۆ کارکردنی پێکەوەیی؛ چونکە هێزمان لە یەکگرتنمانە، و مانەوەمان لە دەستگرتنمانە بە ناسنامە و باوەڕمانەوە.
لە خودای مەزن داواکارین ئەم جەژنە بکاتە سەرەتایەکی نوێی پڕ لە خێر و ئاشتی، گەلەکەمان بپارێزێت، بەرەکەت بخاتە خاکەکەمان، و ئاسایش و سەقامگیری و ئاشتی بە ناوچەکەمان و هەموو جیهان ببەخشێت.
هەموو ساڵێک گەلەکەمان بە هەزاران خێر بێت
ئەکیتۆ برێخا – ساڵی نوێ پیرۆز بێت
هاوپەیمانیی مەسیحی لە عێراق و هەرێمی کوردستان – دەستەی سیاسی