ل باژارێ ئامەدێ، د چارچۆڤێ کۆربەندەکێ نێڤدەولەتی دا، پرسا کۆچبەر و ئاوارەیێن ل هەرێما کوردستانێ هاتە گەنگەشەکرن و پارێزگارێن هەولێر و دهۆکێ ژی جەخت ل سەر پێتڤییا پشتەڤانییا نێڤدەولەتی دکەن.
ئەڤرۆ ڕۆژا چارشەمبی، ١٣ێ گولانا ٢٠٢٦ێ، ل باژارێ ئامەدێ و د چوارچۆڤێ کۆربەندێ “ئاشتی و ئازادییا جڤاکی” دا، دیدارەکا تایبەت بۆ پارێزگارێن هەولێر و دهۆکێ هاتە ڕێکخستن. دیدار ژ لایێ سەنتەرێ ئاسایش و مرۆڤی یێ زانکۆیا ئەمریکی یا کوردستان (AUK) ل دهۆکێ هاتبوو سازکرن و تێدا ب هووری بەحث ل دۆۆزا کۆچ و کۆچبەران ل هەرێما کوردستانێ هاتە کرن.
د دیدارێ دا، پارێزگارێن هەولێر و دهۆکێ تیشک ئافێتنە سەر بزاڤێن بەردەوام یێن حکۆمەتا هەرێما کۆردستانێ بۆ ڤەحەواندنا سەدەها هزار ئاواره و پەنابەران. ئاماژە ب وێ چەندێ دا کو هەرێما کۆردستانێ هەردەم مهڵبەندەکێ ئارام بوویە بۆ پێکڤەژیانا ئاشتییانە یا هەمی پێکهاتێن ئایینی و نەتەوەیی، و بێی چو جوداهی خزمەتگوزاری و هاریکاری پێشکێشی لێقەومایان هاتینە کرن.
هەروەسا د تەوەرەکێ دی یێ دیدارێ دا، پارێزگاران جەخت ل سەر گرنگییا بەردەوامییا هاریکارییێن نێڤدەولەتی کر. وان دیار کر کو بۆ وێ یەکێ حکۆمەتا هەرێمێ بشێت بەردەوامیێ بدەتە پێشکێشکرنا خزمەتگوزاریێن سەرەکی و پاراستنا سەقامگیریا جڤاکی، پێتڤی ب پشتەڤانییا زێدەتر یا جڤاکێ نێڤدەولەتی هەیە، داکو بارێ گران یێ مرۆڤی ل سەر هەرێما کوردستانێ سڤک ببیت.
ئەڤ دیدارە د دەمەکێ دایە، کو هەرێما کوردستانێ سەرەڕای قەیرانێن دارایی، وەک ئێک ژ ناوچە هەرە ئارامێن دەڤەرێ بۆ حەواندنا پەنابەرێن پارچەیێن دی یێن کوردستانێ و ئاوارەیێن عیراقێ دهێتە نیاسین.