سەرۆکایەتی شارەوانی هەولێر ڕەزامەندی کۆتایی لەسەر چارەسەرکردنی کێشەی زەوییەکانی گردجووتیار ڕاگەیاند. بەپێی بڕیارەکە، لەمەودوا خاوەن زەوییەکان دەتوانن مۆڵەتی فەرمیی خانوو وەربگرن و دەست بە پڕۆسەی ئاوەدانکردنەوەی ناوچەکەیان بکەن.
ئەم هەنگاوە بە پاڵپشتی سەرۆکوەزیران مەسرور بارزانی و لە چوارچێوەی هەوڵەکانی کابینەی نۆیەمی حکومەتدا دێت. کارزان هادی، سەرۆکی شارەوانی، ڕایگەیاند کە ڕاسپێردراون بە زووترین کات ڕێکارەکانی دانانی سەرەبلۆک و مۆڵەتدانەکە جێبەجێ بکەن.
ئەم بڕیارە کۆتایی بە چاوەڕوانی چەندین ساڵەی هاووڵاتیانی سنوورەکە دەهێنێت و کێشەی یاسایی زەوییەکانیان چارەسەر دەکات. هاوکات، ڕێگەخۆشکەر دەبێت بۆ بووژانەوەی ناوچەکە و گەیاندنی پڕۆژە خزمەتگوزارییە سەرەکییەکان لە داهاتوویەکی نزیکدا.