ئەمڕۆ یەکشەممە لە نزیک هەولێر کچێک لەناو ئۆتۆمبێلەکەیدا سووتا. ئاسایشی بەحرکەش دەڵێت، ڕووداوەکە خۆکوژییە و کچەکە خۆی سووتاندووە.
موقەدەم شاخەوان سەعید، وتەبێژی بەڕێوەبەرایەتیی بەرگریی شارستانیی هەولێر وتی: ئاگادارکراینەوە ئۆتۆمبێلێک لە دەڤەری زرارەتی سنووری هەولێر گڕیگرتووە و تیمەکانمان بۆ کوژاندنەوەی گەیشتنە شوێنەکە، بەڵام کە گەیشتبوون ئاگرەکە کۆنترۆڵکرابوو، گومانمان کرد ڕووداوەکە تاوانکاری بێت، بۆیە پۆلیسمان ئاگادارکردەوە.
سەرچاوەیەک لە ئاسایشی بەحرکە وتی، ڕووداوەکە خۆکوژییە و کچەکە خۆی ئۆتۆمبێلەکەی سووتاندووە.
موقەدەم کیفاح حەسەن، وتەبێژی بەڕێوەبەرایەتیی پۆلیسی هەولێر لەمبارەیەوە وتی: سەرلەبەیانیی ئەمڕۆ ڕووداوەکە لەسەر ڕێگای گوندی هابابان لە دەڤەری زرارەتی ڕوویداوە.
– وتەبێژی بەڕێوەبەرایەتیی پۆلیسی هەولێر ئاماژەی بەوەدا، ژنەکە بەڕەچەڵەک کوردە بەڵام نازانرێت تەمەنی چەندە.