کۆمەڵەی دڵی ئەمریکا (AHA) لە بەیاننامەیەکی زانستیی نوێدا ڕای گەیاند خواردنەوەی پێنج کوپ قاوە لە ڕۆژێکدا بۆ زۆربەی کەسە پێگەیشتووەکان بێ زیانە.
خواردنەوەی بەردەوامی ئەم خواردنەوەیە مەترسیی جەڵتەی مێشک، شەکرە و سستبوونی دڵ کەم دەکاتەوە. ئەم ڕاپۆرتە فەرمییە لە گۆڤاری Circulation بڵاو کراوەتەوە و وەڵامی چەندین ساڵ لێدوانی دژبەیەک دەداتەوە.
پزیشکان بۆ ماوەیەکی درێژ داوایان لە نەخۆشانی دڵ دەکرد لە قاوە دوور بکەونەوە، بەڵام ئەم توێژینەوە نوێیە جیاوازیی نێوان دەنکە قاوەی سروشتی و کافاینی دەستکردی ڕوون کردووەتەوە. کۆمەڵەی دڵی ئەمریکا گوتی تەنانەت بۆ ئەو نەخۆشانەی بەهۆی ناڕێکیی لێدانی دڵەوە نەشتەرگەرییان کردووە، خواردنەوەی قاوە مەترسیی گەڕانەوەی نەخۆشییەکە بە ڕێژەی ٣٩٪ کەم دەکاتەوە. هەروەها خواردنەوەی قاوە مەترسیی تووشبوون بە شەکرەی جۆری دووەم بە ڕێژەی ٢٠ بۆ ٣٠٪ دادەبەزێنێت.
بەڵام کۆمەڵەکە هۆشداری دەدات شێوازی ئامادەکردنی قاوە کاریگەریی زۆری لەسەر ئەم سوودانە هەیە. ئەم سوودانە تەنها قاوەی خێرا یان ئەو قاوەیەی بە فلتەری کاغەز دەپاڵێورێت دەگرێتەوە. قاوەی نەپاڵێوراو وەک ئیسپرێسۆ یان قاوەی تورکی، مادەی “کافستۆڵ”یان تێدایە کە ئاستی کۆلیسترۆڵی خراپ بەرز دەکاتەوە و دەبێتە هۆی گیرانی دەمارەکان.
ئەم کاریگەرییە ئەرێنییانە خواردنەوە وزەبەخشەکان و حەبی کافاین ناگرێتەوە. خواردنەوە وزەبەخشەکان دەبنە هۆی بەرزبوونەوەی کتوپڕی پەستانی خوێن و تێکچوونی لێدانی دڵ. هەروەها بڕی گونجاوی کافاین لە کەسێکەوە بۆ کەسێکی تر بە گوێرەی جینەکان دەگۆڕێت. هەندێک کەس دەتوانن بە ئاسانی ٤٠٠ میلیگرام کافاین (٣ بۆ ٥ کوپ قاوە) وەربگرن، بەڵام هەندێکی تر بە بڕێکی کەمیش تووشی تێکچوونی خەو دەبن. پزیشکان ڕێنمایی دەدەن هەر کەسێک نەخۆشیی دڵی هەبێت، پێویستە پێش خواردنەوەی قاوە ڕاوێژ بە پزیشکەکەی بکات.
هەواڵی پێشوو