بەپێی توێژینەوەیەکی نوێ کە لە گۆڤاری «Nature Communications»دا بڵاوکراوەتەوە، تەنیایی و گۆشەگیریی کۆمەڵایەتی دەتوانن ساڵانی بەجێماوی ژیانی بێنەخۆشی کەم بکەنەوە، و ڕەگەزی نێر و مێ بە شێوازی جیاواز تووشی زیان دەکەن.
گۆشەگیریی کۆمەڵایەتی بریتییە لە کەمبوونەوەی پەیوەندی و بەشداریی فیزیکی لەگەڵ ئەوانی تردا، لە کاتێکدا تەنیایی ئەزموونێکی دەروونیی سەربەخۆیە لە دابڕان لە جیهانی دەوروبەر.
بڕینی زانیارییەکانی زیاتر لە ۲۷۰ هەزار کەسی پێگەیشتووی تەمەن ٤۰ تا ٦۹ ساڵ دەریخستووە کە هەردوو دیاردەکە بە تێکڕا تا ٦ ساڵ لە ساڵانی تەندروستی و بێنەخۆشیی مرۆڤ کەم دەکەنەوە.
لو چی، مامۆستای زانکۆی توولەین و نووسەری سەرەکیی توێژینەوەکە ڕایگەیاند کە گۆشەگیری و تەنیایی کاریگەرییەکی بەرچاویان لەسەر درێژیی تەمەنی بێنەخۆشی هەیە.
پەیوەندیی تەنیایی و گۆشەگیری لەگەڵ لەدەستدانی ساڵانی بێنەخۆشیی دەروونی (وەک خەمۆکی و دڵڕاوکێ) زۆر بەهێزتر بووە لە پەیوەندییان لەگەڵ نەخۆشییە جەستەیییەکان (وەک شەکرەی جۆری دوو، نەخۆشییەکانی دڵ، نەخۆشییە درێژخایەنەکانی کۆئەندامی هەناسە دان، نەخۆشییەکانی مێشک و شێرپەنجە).
پەیڕەوکردنی شێوازی ژیانی تەندروست دەتوانێت تا ڕادەیەک کاریگەرییە نەرێنییەکانی گۆشەگیریی کۆمەڵایەتی کەم بکاتەوە، بەڵام ناتوانێت بە تەواوەتی قەرەبووی زیانەکانی تەنیایی بکاتەوە.
لەلای ژنان، تەنیایی و گۆشەگیری ببووە هۆی لەدەستدانی ۲٫٤ ساڵ لە تەندروستیی جەستەیی و ۳٫۷ ساڵ لە تەندروستیی دەروونی.
لەلای پیاوان، ببووە هۆی لەدەستدانی ۱٫۷ ساڵ لە تەندروستیی جەستەیی و ٥٫٨ ساڵ لە تەندروستیی دەروونی.
پیاوان زیاتر لە ژنان لە یەک کاتدا ڕووبەڕووی تەنیایی و گۆشەگیری ببوونەوە، چونکە زیاتر پشتیان بە ئامادەبوونی فیزیکی و پەیوەندیی کۆمەڵایەتی بەستووە، لە کاتێکدا ژنان زیاتر سوود لە پشتیوانیی سۆزداری وەردەگرن.