پاشنیوەڕۆی ئەمڕۆ هەینی، لە سنووری قەزای بنەسڵاوەی سەر بە پارێزگای هەولێر، ڕووداوێکی دڵتەزێنی کوشتن ڕوویدا و تێیدا ئافرەتێک لەلایەن کوڕەکەی خۆیەوە كوژرا.
بەڕێوەبەرایەتی پۆلیسی پارێزگای هەولێر لە ڕاگەیەندراوێکدا ئاماژەی بەوە کرد، کە کاتژمێر ٤:٠٠ی ئێوارەی ئەمڕۆ هێزەکانیان ئاگادارکراونەتەوە لە هەبوونی ڕووداوێکی کوشتن لە قەزای بنەسڵاوە. دوای گەیشتنی تیمەکان و دەستپێکردنی لێکۆڵینەوە سەرەتاییەکان، دەرکەوتووە کە کوژراوەکە ئافرەتێکە بەناوی (ن، ن، ڕ) و لەلایەن کوڕەکەیەوە کوژراوە.
بەگوێرەی ڕاگەیەندراوەکەی پۆلیس، هێزەکانی بنکەی پۆلیسی بنەسڵاوە توانیویانە لە کاتێکی پێوانەییدا و دەستبەجێ تۆمەتبارەکە دەستگیر بکەن.
لە ئێستادا پۆلیسی هەولێر پەڕاوی لێکۆڵینەوەی بۆ ڕووداوەکە ڕێکخستووە و ڕێکارە یاساییەکان بەرامبەر تۆمەتبارەکە دەستی پێکردووە، تاوەکو هۆکار و وردەکاری زیاتری پشت ڕووداوەکە ئاشکرا بکرێت.