دکتۆر شەهرام عەلی کەژۆ
ئەم ڕۆژە بەشێکە لە بیرەوەری و ناسنامەی سیاسیی ئێمە چونکە لە ١٦ی ئابی ساڵی ١٩٤٦دا هەم پارتی دیموکراتی کوردستان دامەزرا و هەم سەرۆک مەسعود بارزانی لەدایک بوو. ئەو هاوکاتییە، بە درێژایی ساڵان بووە بە پەیوەندییەکی قووڵ لە نێوان ڕابەر و ڕێبازێکدا کە مێژوویان بە مێژووی کوردستانەوە گرێ دراوە.
پارتیمان لە بارودۆخێکی ئاساییدا دانەمەزراوە بەڵکو لە سەردەمێکدا دامەزرا کە کورد لە عێراق مافە سەرەتاییەکانی خۆی نەبوو، دەنگی سیاسیی بە ئاسانی دەخنکێنرا و هەر داواکارییەکی نەتەوەیی بە گومان و دوژمنکاری وەردەگیرا. لەو بارودۆخەدا، دامەزراندنی پارتێکی نیشتمانی تەنها دروستکردنی حزبێکی سیاسی نەبوو، هەوڵێک بوو بۆ ئەوەی دەنگی کورد لە ناوەندی بڕیارداندا هەبێت و خەباتی نەتەوەیی لە چوارچێوەیەکی ڕێکخراو و بەردەوامدا بەڕێوە بچێت.
مێژووی ئەم پارتە پڕە لە ئاوارەیی، شۆڕش، شکستی کاتی، هەستانەوە و قوربانیدان. هەزاران پێشمەرگە و کادر و ئەندام و خێزان، بەشێک لە ژیان و ئارامیی خۆیان بۆ پاراستنی ئەم ڕێبازە داناوە.
ئەمڕۆ پارتی، بۆ ئێمە تەنها حزبێکی هەڵبژاردن و لە دەسەڵات نییە. لە ماڵی زۆرێک لە ئێمەدا، ناوی پارتی پەیوەستە بە بیرەوەریی باوک و باپیرانمان، بە پێشمەرگەیەک کە نەگەڕایەوە، بە دایکێک کە چاوەڕێی کوڕەکەی مایەوە، یان بە خێزانێک کە لەبەر هەڵوێستی نیشتمانیی خۆی ناچار بوو ماڵ و گوندەکەی بەجێبهێڵێت. بۆیە پەیوەندیی خەڵک بە پارتی تەنها پەیوەندییەکی سیاسی نییە، بەڵکوو پەیوەندییەکی مێژوویی و سۆزداری و خێزانییە.
لە ناو ئەم مێژووەدا، ژیانی سەرۆک مەسعود بارزانی بە ڕێڕەوی پارتی و بزووتنەوەی ڕزگاریخوازیی کوردستانەوە گرێ دراوە. ئەو لە خێزانێکدا لەدایک بوو کە ژیانیان لە خەبات و ئاوارەیی و بەرپرسیارێتی جیا نەبووەوە. لە منداڵییەوە تا ئەمڕۆ، زۆربەی قۆناغە سەخت و هەستیارەکانی مێژووی کوردستانی بینیوە، لە کۆماری کوردستان و ئاوارەیی و شۆڕشەکانەوە تا ڕاپەڕین و دامەزراندنی دەسەڵاتی هەرێم و ڕووبەڕووبوونەوە لەگەڵ تیرۆر.
لە ماوەی سەرکردایەتیی ئەودا، کوردستان بە قۆناغی جیاواز و هەندێک جار زۆر مەترسیداردا تێپەڕیوە. لە هەر قۆناغێکدا بڕیارەکان ئاسان نەبوون و هەموو بڕیارێکیش لە ژێر کاریگەریی بارودۆخی ناوخۆیی، عێراقی و ناوچەییدا دراوە. ڕەنگە هەر کەسێک خوێندنەوەی خۆی بۆ هەندێک لەو بڕیارانە هەبێت، بەڵام ئەوەی ناتوانرێت نادیدە بگیرێت ئەوەیە کە سەرۆک بارزانی لە قۆناغە چارەنووسسازەکاندا بەرپرسیارێتیی هەڵگرتووە و لە هەڵوێستە سەرەکییەکانیدا پاراستنی ناسنامە و مافی نەتەوەییی کوردی بە بنەما داناوە.
ئێمە کە خۆمان بە بەشێک لەم ڕێبازە دەزانین، شانازی بە ڕابردووی پارتی دەکەین و ئەو قوربانییانەی پێش ئێمە دراون، نابێت تەنها ببنە وێنە و یادەوەری، دەبێت ببنە هۆی ئەوەی بە پاکی و بەرپرسیارییەوە کار بکەین و بەرژەوەندیی کوردستان لەسەرووی بەرژەوەندیی تاکەکەسی و کاتی دابنێین.
ئەمڕۆ، دوای هەشتا ساڵ، پارتی دیموکراتی کوردستان بەرهەمی خەباتی نەوەیەک نییە، ئەمانەتی چەندین نەوەیە. ئەم ئەمانەتە بە قوربانیی هەزاران شەهید پارێزراوە و بە ئیرادەی خەڵکی کوردستان گەیشتووەتە ئەمڕۆ. بۆیە پاراستنی ئەو تەنها پاراستنی پارتێکی سیاسی نییە بەڵکوو پاراستنی بەشێکی گرنگە لە مێژوو، ناسنامە و دەستکەوتە نەتەوەییەکانمان.
شانزەی ئاب بۆ ئێمە ڕۆژی پیرۆزباییکردنە، بەڵام لە هەمان کاتدا ڕۆژی پێداچوونەوە و نوێکردنەوەی بەڵێنیشە. بەڵێن بە شەهیدان کە خوێنیان بەفیڕۆ نادرێت، بەڵێن بە پێشمەرگە کە قوربانییەکانی لەبیر ناکرێت، بەڵێن بە خەڵکی کوردستان کە خزمەتکردنیان لە سەرووی هەموو ئامانجێک دەبێت و بەڵێن بە نەوەکانی داهاتوو کە کوردستانێکی بەهێزتر، ئازادتر و پێشکەوتووتر بۆیان بەجێ بهێڵین.
لە هەشتایەمین یادی لەدایکبوونی سەرۆک مەسعود بارزانی و ساڵیادی دامەزراندنی پارتی دیموکراتی کوردستاندا، بە ڕێز و وەفادارییەوە سەری ڕێز بۆ گیانی پاکی هەموو شەهیدانی کوردستان دادەنوێنین و پیرۆزبایی لە سەرۆک بارزانی، بنەماڵەی سەربەرزی شەهیدان، پێشمەرگە قارەمانەکان، ئەندامان و جەماوەری پارتی و هەموو خەڵکی کوردستان دەکەین.
پیرۆز بێت یادی لەدایکبوونی سەرۆک مەسعود بارزانی.
پیرۆز بێت هەشتا ساڵ خەبات و بەردەوامیی پارتی دیموکراتی کوردستان.بەردەوام بێت ڕێبازی بارزانی و سەربەرز بێت کوردستان.