دووشەممە، ١٧ی ئابی ٢٠٢٦، دکتۆر فوئاد حوسێن، وەزیری دەرەوەی عێراق، پەیوەندییەکی تەلەفۆنی لەگەڵ عەباس عێراقچی، وەزیری دەرەوەی ئێران ئەنجامدا. تەوەرەی سەرەکی پەیوەندییەکە تایبەت بوو بە گفتوگۆکردن دەربارەی ئەو هێرشە تێرۆریستییەی کە لە ڕێگەی فڕۆکەی بێفڕۆکەوانی جۆری «حەدید ١١٠» کرایە سەر شوێنی نیشتەجێبوون و نووسینگەی تایبەتی مەسرور بارزانی، سەرۆکی حکومەتی هەرێمی کوردستان.
لە میانی پەیوەندییەکەدا، فوئاد حوسێن ئاماژەی بەوە کرد کە پێشتر حکومەتی ئێران هێرشەکانی بۆ سەر هەرێم بە بیانووی هەبوونی پارت و لایەنە ئۆپۆزسیۆنەکانی ئێران پاساو دەهێنایەوە، بەڵام ئەم هێرشەی دوایی کە بە شێوەیەکی ڕاستەوخۆ بارەگای سەرۆکی حکومەتی هەرێمی کردووەتە ئامانج، “پێشهاتێکی مەترسیدارە” و دەبێتە هۆی تێکدانی سەقامگیری و زیادبوونی گرژییەکان لە ناوچەکەدا.
وەزیری دەرەوەی عێراق بە توندی سەرکۆنەی ئەم هێرشە بێ پاساوەی کرد و داوای لە لایەنی ئێرانی کرد ڕوونکردنەوەی فەرمییان هەبێت. جەختیشی کردەوە کە ئەم جۆرە کارانە پەرەسەندنێکی مەترسیدارن و لێکەوتەی نەرێنییان لەسەر ئاسایشی عێراق و ناوچەکە دەبێت.
لەلایەن خۆیەوە، عەباس عێراقچی، وەزیری دەرەوەی ئێران، سەرسوڕمانی خۆی لەو هێرشە دەربڕی و ڕایگەیاند: “هیچ زانیارییەکمان لەبەردەستدا نییە کە هێرشەکان لە خاکی ئێرانەوە ئەنجام درابێتن.” عێراقچی ئاماژەی بەوەش کرد کە هیچ پاساوێک بۆ کارێکی لەو شێوەیە نییە، بەتایبەت لە سایەی ئەو پەیوەندییە بەهێز و ئەرێنییەی کە لە نێوان تاران و حکومەتی هەرێمی کوردستان و پارتە سەرەکییەکاندا هەیە.
لە کۆتایی پەیوەندییەکەدا، فوئاد حوسێن داوای لە کۆماری ئیسلامی ئێران کرد هەڵوێستی فەرمی خۆی و ناسنامەی ئەو لایەنانەی لە پشت هێرشەکەوەن ئاشکرا بکات. وەزیری دەرەوەی ئێرانیش جەختی لەوە کردەوە کە وڵاتەکەی دژی هەر کارێکە ببێتە هۆی ناسەقامگیری و بەڵێنیدا لە نزیکترین کاتدا بەیاننامەیەکی فەرمی بۆ ڕوونکردنەوەی هەڵوێستی تاران بڵاو بکەنەوە.