فوئاد حوسێن، وەزیری دەرەوەی عێراق لە پەیوەندییەکی تەلەفۆنیدا لەگەڵ هاوتا ئێرانییەکەی عهباس عێراقچی، پرسی هێرشکردنە سەر نووسینگەی مەسرور بارزانی، سەرۆکی حکومەتی هەرێمی کوردستانی تاوتوێ کرد و داوای ڕوونکردنەوەی فەرمی لە تاران دەکات.
وەزیری دەرەوەی عێراق لە میانی قسەکانیدا جەختی لەوە کردەوە کە بە ئامانجگرتنی بارەگای سەرۆکی حکومەتی هەرێم “پێشهاتێکی مەترسیدارە” و دەبێتە هۆی زیادبوونی گرژییەکان و هەڕەشە لە سەقامگیریی ناوچەکە دەکات. ڕاشیگەیاند: “داوا لە لایەنی ئێرانی دەکەین هەڵوێستی فەرمی خۆی لەسەر ئەو دەستدرێژییە و ئەو لایەن و هۆکارانەی لە پشت هێرشەکەوەن، بۆ عێراق ڕوون بکاتەوە.”
لەلایەن خۆیەوە، وەزیری دەرەوەی ئێران ئاماژەی بەوە کرد کە وڵاتەکەی هیچ زانیارییەکی لەبەردەستدا نییە کە بیسەلمێنێت هێرشەکان لە ناو خاکی ئێرانەوە ئەنجام درابێتن.
هەروەها وەزیری دەرەوەی ئێران دووپاتی کردەوە کە کۆماری ئیسلامی دژی هەر هەنگاوێکە ببێتە هۆی تێکدانی سەقامگیری و پەرەپێدانی گرژییەکان، بەڵێنیشی دا کە بەم زووانە حکومەتی ئێران بەیاننامەیەکی فەرمی بۆ ڕوونکردنەوەی هەڵوێستی خۆی سەبارەت بەم ڕووداوە بڵاو بکاتەوە.