سەبارەت بە هێرشەکانی ئەم دواییەی سەر هەرێمی کوردستان.. داوای «جووڵەی نێودەوڵەتی» دەکرێت و داوا لە بەغدا دەکرێت بابەتەکە بگەیەنێتە ئەنجوومەنی ئاسایش و مافەکانی مرۆڤ.
نووسینگەی ڕێکخەری ڕاسپاردە نێودەوڵەتییەکانی حکوومەتی هەرێمی کوردستان، نیگەرانی قووڵی خۆی بەرامبەر ئەو هێرشانە دەربڕی کە کرانە سەر هەرێمی کوردستان، کە دواینیان هێرشەکەی ئەمڕۆ بوو لە ڕێگەی فڕۆکەی بێفڕۆکەوانەوە، کە بەپێی زانیاری و لێکۆڵینەوەکانی بەڕێوەبەرایەتیی دژە تیرۆری هەرێم، نووسینگەی تایبەتی سەرۆکی حکوومەتی هەرێمی کوردستان و شوێنی نیشتەجێبوونی سەرۆکی ئاژانسی ئاسایش و هەواڵگری (پاراستن)ی لە هەولێر کردە ئامانج.
بەردەوامبوونی ئەم هێرشانە بە مووشەک و فڕۆکەی بێفڕۆکەوان، هەڕەشەیەکی جدییە بۆ سەر ئاسایشی دانیشتووان و سەقامگیریی دامەزراوەکان و سەلامەتیی پڕۆسەی دیموکراتی لە هەرێم، هەروەها نیگەرانی جدی سەبارەت بە پاراستنی مەدەنییەکان و مافی ژیان و سەلامەتی جەستەیی دروست دەکات، جگە لە کاریگەرییەکانی لەسەر کەرتەکانی تەندروستی، پەروەردە، کار، سەقامگیری ئابووری و هەلی وەبەرهێنان.
نووسینگەکە جەخت دەکاتەوە کە هەرێمی کوردستان خاوەن پێگەیەکی دەستوورییە لە چوارچێوەی کۆماری عێراقی فیدراڵ بەپێی دەستووری ساڵی 2005، و پێویستە ڕێزگرتن لە سەروەریی عێراق و پاراستنی خاکەکەی و دانیشتووان و دامەزراوەکانی، بەپێی یاسا نێودەوڵەتییەکان و میساقی نەتەوە یەکگرتووەکان بێت.
هەروەها نووسینگەکە جەخت دەکاتەوە کە هەڵسەنگاندنی ئەم هێرشانە دەبێت لەسەر بنەمای یاسای نێودەوڵەتیی مافەکانی مرۆڤ و یاسای نێودەوڵەتیی مرۆیی بێت، لەوانەش بنەماکانی جیاکاری، گونجاوی، زەرورەت و ڕێکارە پێویستەکان بۆ پاراستنی مەدەنییەکان، سەرەڕای هەڵوێستی ڕاگەیەندراوی حکومەتی هەرێمی کوردستان بەرامبەر ململانێکان لە ناوچەکەدا و بەکارنەهێنانی خاکەکەی وەک سەرچاوەیەک بۆ هەر هێرش، یان کارێکی دوژمنکارانە لە نێوان لایەنە ناکۆکەکاندا. هەروەها ئاماژە بە بڕیار و هەڵوێستەکانی ئەنجوومەنی مافەکانی مرۆڤ و بەیاننامەکانی پێشووی نەتەوە یەکگرتووەکان دەکات سەبارەت بە مەترسییەکانی بەکارهێنانی مووشەک و فڕۆکەی بێفڕۆکەوان لە ململانێکاندا لەسەر بەدەستهێنانی مافەکانی مرۆڤ.
لەسەر ئەم بنەمایە، نووسینگەی ڕێکخەری ڕاسپاردە نێودەوڵەتییەکان سەرکۆنەی هێرشە دووبارەبووەکانی سەر هەرێمی کوردستان بە فڕۆکەی بێفڕۆکەوان و مووشەک دەکات و داوا لە حکوومەتی فیدراڵ دەکات، نامەیەکی ناڕەزایەتی فەرمی سەبارەت بەم هێرشانە ئاراستەی ئەنجوومەنی ئاسایش بکات و داوا لە ئەنجوومەنی مافەکانی مرۆڤ بکات گفتوگۆ لەسەر کاریگەرییەکانی ئەو هێرشانە لەسەر مافەکانی مرۆڤ لە جنێف بکات و داوای گرتنەبەری ڕێکاری گونجاو بکات بۆ دابینکردنی پاراستنی مەدەنییەکان، و ڕێزگرتن لە سەروەریی عێراق و پاراستنی خاکەکەی، و ڕێگریکردن لە دووبارەبوونەوەی ئەم هێرشانە.
نووسینگەکە دووپاتی دەکاتەوە کە هەرێمی کوردستان بەردەوام دەبێت لە پابەندبوونی بە ڕێبازی دیموکراتی، پاراستنی مافەکانی مرۆڤ، ڕێزگرتن لە پابەندبوونە نێودەوڵەتییەکانی، و کارکردن لەپێناو ئاسایش و سەقامگیری لە عێراق و ناوچەکەدا.
نووسینگەی ڕێکخەری ڕاسپاردە نێودەوڵەتییەکان
حکوومەتی هەرێمی کوردستان