بەمەبەستی پتەوکردنی هەماهەنگیی سەربازی و ئەمنی، ئەمڕۆ یەکشەممە، کۆبوونەوەیەکی باڵا لە نێوان فەرماندە باڵاکانی هێزە ئەمنییەکانی عێراق و وەزارەتی پێشمەرگە لە شاری بەغدا بەڕێوەچوو.
بەگوێرەی راگەیەندراوێکی وەزارەتی پێشمەرگە، کۆبوونەوەکە بە ئامادەبوونی فەریقی یەکەم روکن عبدالامیر شەممەری، بەڕێوەبەری نووسینگەی تایبەتی سەربازی فەرماندەی گشتی هێزە چەکدارەکانی عێراق، و فەریق روکن عیسا عوزێر، سەرۆکی ئەرکانی وەزارەتی پێشمەرگە، و ژمارەیەک لە ئەفسەرانی باڵا و بەرپرسانی دەزگا ئەمنییەکانی هەرێمی کوردستان و عێراق ئەنجامدرا.
تەوەری سەرەکی کۆبوونەوەکە تەرخانکرابوو بۆ تاوتوێکردنی بارودۆخی ئەمنی لەو ناوچانەی جێی بایەخی هاوبەشی هەردوولان. لەو چوارچێوەیەدا، جەخت کرایەوە لەسەر گرنگیی رۆڵی “لیوا هاوبەشەکان” بۆ پاراستنی سەقامگیری و کۆنتڕۆڵکردنی ئەو ناوچانە بە شێوەیەکی تۆکمەتر.
هەر لە کۆبوونەوەکەدا، پرسی ئاسایشی سنوورەکان و هەماهەنگی نێوان پاسەوانی سنوور و هێزەکانی پێشمەرگە باسکران. هەروەها هەردوولا گفتوگۆیان کرد لەسەر داڕشتنی بەرنامە و پڕۆگرامی مەشق و راهێنانی هاوبەش، بە ئامانجی بەرزکردنەوەی توانای سەربازی و گۆڕینەوەی ئەزموون لە نێوان هێزە ئەمنییەکاندا.
ئەم کۆبوونەوەیە لە چوارچێوەی هەوڵە بەردەوامەکانی نێوان هەولێر و بەغدایە بۆ پڕکردنەوەی بۆشاییە ئەمنییەکان و بەرەنگاربوونەوەی مەترسییەکان لە ناوچە جیاجیاکانی عێراق.
