د. دیندار زێباری، ڕێکخەری ڕاسپاردە نێودەوڵەتییەکان لە حکومەتی هەرێمی کوردستان، لەگەڵ بەڕێز تیتۆن میترا، نوێنەری نیشتەجێی بەرنامەی گەشەپێدانی نەتەوە یەکگرتووەکان (UNDP) لە عێراق، کۆبووەوە بۆ گفتوگۆکردن لەسەر بەهێزکردنی هاوبەشی و هاوکاریی نێوان هەرێمی کوردستان و UNDP لە بوارەکانی حوکمڕانی، پەرەپێدانی دامەزراوەیی، یاسا و مافەکانی مرۆڤ.
لە کۆبوونەوەکەدا، جێبەجێکردن و بەدواداچوونی ڕاسپاردەکانی پێداچوونەوەی گشتی (UPR) بە شێوەیەکی تایبەت تاوتوێ کران. د. زێباری جەختی لە گرنگی گۆڕینی ڕاسپاردە نێودەوڵەتییەکان بۆ هەنگاوی دامەزراوەیی، ئەنجامی پێوانەکراو و میکانیزمی کاریگەر بۆ چاودێری و بەدواداچوون کردەوە.
هەروەها د. زێباری ڕاپۆرتی «هاوبەشییە نێودەوڵەتییەکان بۆ پێشخستنی مافەکانی مرۆڤ لە هەرێمی کوردستان: شیکارییەکی بەراوردکاری لە چوارچێوەی UPR» پێشکەش کرد و لەسەر دامەزراندنی میکانیزمێکی تایبەت بۆ بەدواداچوون و ڕاپۆرتکردن لەسەر ڕاسپاردە نێودەوڵەتییەکانی مافەکانی مرۆڤ گفتوگۆ کرا.
لە کۆتاییدا، هەردوو لایەن دەرفەتەکانی یارمەتیی تەکنیکی، بەهێزکردنی تواناکان و دروستکردنی چوارچێوەیەکی ستراتیژیتر بۆ هاوکاریی نێوان هەرێمی کوردستان و UNDP تاوتوێ کرد، بە ئامانجی بەهێزکردنی دامەزراوەکان، حوکمڕانی بەرپرسیار و گەشەپێدانی بەردەوام لە هەرێمی کوردستان.