بەڕێوەبەرایەتی هاتووچۆی کۆیە ڕایگەیاند، بەهۆی پێکدادانی نێوان بارهەڵگرێک و ئۆتۆمبێلێکی تاکسی لەسەر ڕێگەی کۆیە – سماقوڵی، کەسێک گیانی لەدەستدا و دوو کەسی دیکەش بریندار بوون.
بەگوێرەی ڕاگەیەندراوێکی بەڕێوەبەرایەتی هاتووچۆی کۆیە، ڕووداوەکە لە نزیک سێڕێیانی جەلی لە جۆری پێکدادان بووە لەنێوان ئۆتۆمبێلێکی بارهەڵگر و تاکسییەکدا.
لە ئەنجامی بەیەکدادانەکەدا سەرنشینێکی ناو بارهەڵگرەکە دەستبەجێ گیانی لەدەستداوە و دوو سەرنشینی دیکەش تووشی برینداری بوون، بەمەش ژمارەی قوربانییانی ڕووداوەکە گەیشتە سێ کەس.
لە کۆتایی ڕاگەیەندراوەکەدا، هاتووچۆی کۆیە داوای لە تەواوی شۆفێران کردووە پابەندی هێماکانی شەقام و ڕێنماییەکانی هاتووچۆ بن، بە مەبەستی پاراستنی سەلامەتیی گیانی هاووڵاتییان و ڕێگریی لە ڕوودانی ڕووداوی نەخوازراوی هاوشێوە.