ئەمڕۆ سێشەممە، 8ـی ئەیلوولی 2026، باسم محەمەد خزەیرعەبادی، وەزیری نەوتی عێراق جەختیکردەوە، هەناردەکردنی نەوتی عێراق دوای ئەوەی بەهۆی گرژییە ئەمنی و سەربازییەکانی ناوچەکەوە بۆ ئاستێکی پێوانەیی دابەزیبوو، ئێستا بەتەواوی چاک بووەتەوە، گوتیشی، قەیرانی کەمیی سووتەمەنی لە داهاتوودا دووبارە نابێتەوە.
عەبادی سەرۆکایەتیی کۆبوونەوەی شانەی قەیرانەکانی کرد بۆ تاوتوێکردنی پرۆسەکانی بەرهەمهێنان و هەناردەکردنی نەوت، هەروەها بەرهەمهێنان و دابینکردنی بەرهەمە نەوتییەکان. لەم کۆبوونەوەیەدا بریکارانی وەزارەت، راوێژکاران و بەڕێوەبەرە گشتییەکانی کۆمپانیا و فەرمانگەکانی وەزارەت ئامادە بوون.
وەزارەتی نەوت لە راگەیەندراوێکی فەرمیدا ئاشکرایکرد، عەبادی لە کۆبوونەوەکەدا جەختی لەسەر پێویستیی بەدواداچوونی بەردەوامی جێگیری و رێکخستنی پرۆسەی دابینکردنی بەنزین بۆ هاووڵاتییان کردەوە لەلایەن بەڕێوەبەرە گشتییە پەیوەندیدارەکان. وەزیری نەوت پێداگری کرد: “نابێت لە داهاتوودا هیچ کەموکوڕی و کێشەیەک لە پرۆسەی دابینکردنی سووتەمەنی رووبدات”.
عەبادی لەو کۆبوونەوەیەدا جەختیکردەوە، پێویستە چاودێریی وردی ئاستی بەکاربردن و پێداویستیی راستەقینە بکرێت. ئەو بەرپرسە گرنگیی یەکخستنی هەموو هەوڵ و تواناکانی بۆ تەواوکردنی ئەو پڕۆژانە دووپاتکردەوە کە دەبنە هۆی بەردەوامیی بەرهەمهێنان و بەرزکردنەوەی ئاستەکەی بەمەبەستی پشتیوانیکردنی ئابووریی وڵات.
عەبادی روونیکردەوە، سەرەڕای قەیرانەکانی ناوچەکە هەناردەکردنی نەوتی عێراق گەیشتووەتە قۆناخێکی گرنگ. بەگوێرەی راگەیەندراوەکەی وەزارەتی نەوت، لە کۆبوونەوەکەدا سەرجەم بابەتەکانی نێو خشتەی کار تاوتوێ کران و بڕیاری پێویستیان لەبارەوە درا.