بەهۆی گواستنەوەی نەوتی خاو و گازی ئێرانەوە، وەزارەتی گەنجینەی ئەمریکا زیاتر لە ١٠ کۆمپانیا و کەشتیی خستە لیستی سزاکانییەوە.
لە ڕاگەیاندراوی وەزارەتی گەنجینەی ئەمریکادا هاتووە، ئەو کۆمپانیا و کەشتییانە، نەوتی خاو و گازی ئێرانیان بۆ وڵاتانی سووریا و ڕۆژهەڵاتی ئاسیا گواستووەتەوە و هاوکاریی سوپای پاسداران و فەیلەقی قودس و حزبوڵلای لوبنانیان کردووە.
لە ڕاگەیاندراوەکەدا جەخت کراوەتەوە، بەهۆی سزاکانی ئەمریکا دژی ئێران، گواستنەوەی نەوت و گازی ئەو وڵاتە نایاساییە و بە قاچاغ دەژمێردرێت.
برادلی تی سمیت، جێگری وەزیری گەنجینەی ئەمریکا بۆ کاروباری تیرۆریزم و زانیارییە داراییەکان دەڵێت، ئێران بەردەوام پشت بە فرۆشتنی نایاسایی نەوت و گاز لە ڕێگەی سوپای پاسداران و حزبوڵلای لوبنانەوە دەبەستێت بۆ دابینکردنی پێداویستیی دارایی هێزە پرۆکسییەکانی و ناسەقامگیرکردنی ڕۆژهەڵاتی ناوەڕاست.