بڕیارە ئهمڕۆ شەممە دانوستانکارانی ئەمریکا بەرەو پاکستان بەڕێ بکەون، بەڵام ئێران ڕایگەیاند، بەرپرسەکانیان پلانیان نییە بۆ کۆتاییهێنانی ئەو جەنگە لەگەڵ ئەمریکییەکان کۆببنەوە.
کۆشکی سپی ڕایگەیاند کە ستیڤ ویتکۆف، نێردەی تایبەتی سەرۆک دۆناڵد ترەمپ و جارید کوشنەری زاوای، بڕیارە ئهمڕۆ شەممە بۆ ئەنجامدانی گفتوگۆ لەگەڵ عەباس عێراقچی، وەزیری دەرەوەی ئێران، بەڕێ بکەون.
پیت هێگسێت، وەزیری بەرگری ئەمریکا بە ڕۆژنامەنووسانی ڕاگەیاند کە ئێران دەرفەتی ئەوەی هەیە “ڕێککەوتنێکی باش” لەگەڵ بکات. وتیشی: “ئێران دەزانێت هێشتا پەنجەرەیەکی کراوەیان لەبەردەمدایە بۆ ئەوەی بە ژیرانە هەڵی بژێرن. تەنها ئەوەیان لەسەرە کە بە شێوەیەکی مانادار و سەلمێنراو دەستبەرداری چەکی ئەتۆمی ببن.”
ترەمپ: ئێران پلانی هەیە پێشنیازێک پێشکەش بکات
عێراقچی ڕۆژی هەینی گەیشتە ئیسلام ئابادی پایتەخت. بەڵام وتەبێژی وەزارەتی دەرەوەی ئێران لە پۆستێکدا لە تۆڕی کۆمەڵایەتی (X) بڵاویکردەوە کە بەرپرسانی ئێران پلانیان نییە لەگەڵ نوێنەرانی ئەمریکا کۆببنەوە و نیگەرانییەکانی تاران لە ڕێگەی پاکستانی ناوبژیوانەوە دەگەیەنرێن. کۆشکی سپی دەستبەجێ وەڵامی داواکارییەکانی بۆ لێدوان لەسەر ئەو ڕاگەیەندراوەی ئێران نەدایەوە.
واشنتن و تاران لە چەقبەستووییەکی تێچوودا گیریان خواردووە، چونکە ئێران تا ڕادەیەکی زۆر گەرووی هورمزی داخستووە، کە بە شێوەیەکی ئاسایی پێنجیەکی نەوتی جیهانی پێدا تێدەپەڕێت، لە کاتێکدا ئەمریکا ڕێگری لە هەناردەکردنی نەوتی ئێران دەکات. ئەم ململانێیەی کە چووەتە نۆیەمین هەفتەیەوە، نرخی وزەی بۆ بەرزترین ئاستی چەند ساڵی ڕابردوو بەرزکردووەتەوە، ئەمەش بووەتە هۆی هەڵاوسان و تەڵخکردنی ئاسۆکانی گەشەی جیهانی.
ترەمپ ڕۆژی هەینی بە ڕۆیتەرزی ڕاگەیاند کە ئێران پلانی هەیە پێشنیازێک پێشکەش بکات بە مەبەستی جێبەجێکردنی داواکارییەکانی ئەمریکا، بەڵام وتی نازانێت پێشنیازەکە چی لەخۆ دەگرێت. ئامادە نەبوو بڵێت واشنتن لەگەڵ کێ دانوستان دەکات، تەنها وتی “ئێمە لەگەڵ ئەو کەسانە مامەڵە دەکەین کە ئێستا لە دەسەڵاتدان.”
کارۆلین لیڤیت، وتەبێژی کۆشکی سپی ڕایگەیاند، ئەمریکا لە چەند ڕۆژی ڕابردوودا هەندێک پێشکەوتنی لە لایەنی ئێرانییەوە بینیوە و هیوادارە لەم کۆتایی هەفتەیەدا پێشکەوتنی زیاتر بەدەست بێت، هەروەها ئاماژەی بەوەدا کە جەی دی ڤانس، جێگری سەرۆک کۆمار ئامادەیە گەشت بۆ پاکستان بکات.
رۆیتهرز