دوای ئاڵۆزی و کێشەکانی یاری گەڕی چواردەی خولی پلەیەکی کوردستان لەیاری نێوان یانەی بازیان و سۆران، لێژنەی پێداچوونەوە و سزادانی یەکێتی تۆپی پێی کوردستان چەن بڕیارێکیدا و سزای توندی یانەی بازیان و سەرپەرشتیاری یانەی سۆرانیدا.
بەپێی ڕاگەیاندراوی یەکێتی تۆپی پێی کوردستان،بەپێی ڕاپۆرتی ناوبژیوانان قسەیان لەسەر دۆسیەکە کردوە و بەهۆی تەقاندی دوو فیشەک لەنێو مەیدانی یاریگادا بڕیاری سزادانی داوە و لەئەگەری دووبارە کردنەوەی حاڵەتی دیکە سزای توندتر دووچاری یانەی بازیان دەبێتەوە،چونکە پێیان وایە ئەمە هەڕەشەی جدیە لەسەر گیانی ناوبژیوانان.
سزاکانی یەکێتی تۆپی پێی کوردستان بەم شێوەیەن
1- هەژمارکردنی ئەنجامی یاری نێوان (یانەی بازیان × یانەی سۆران) بە (0-3) بۆ بەرژەوەندی یانەی سۆران.
2- ئاراستەکردنی ئاگادارکردنەوەیەکی توند بۆ یانەی بازیان؛ لە کاتی دووبارەبوونەوەی هەر پێشێلکارییەکی هاوشێوە، یانەکە ڕووبەڕووی سزای قورستر دەبێتەوە.
3- سزادانی سەرپەرشتیاری یانەی سۆران (فەرهەنگ سعدی) بەهۆی دروستکردنی گرژی و ئاڵۆزی، پاڵپشت بە بڕگەکانی (أ) و (ب) لە ماددەی (9)ی تایبەت بە کارگێڕان و ڕاهێنەران، بە دوورخستنەوەی بۆ (7) یاری و غەرامەکردنی بە بڕی 1000000 یەک ملیۆن دیناری عێراقی.
تێبینییەکان:
1- یەکێتی تۆپی پێی کوردستان ڕایدەگەیەنێت کە بردنە ژوورەوەی هەر جۆرە چەکێک بۆ ناو یاریگا بە هەموو شێوەیەک قەدەغەیە و یەکێتییەکە دەسەڵاتی تەواوی یاسایی هەیە بۆ سزادانی سەرپێچیکاران.
2- دۆسیەی سەرۆکی یانەکانی بازیان و کفری لە ژێر لێکۆڵینەوەدایە.
3- ئەم بڕیارانە لە کاتی بڵاوکردنەوەیانەوە، لە ماوەی 48 کاتژمێردا مافی تێهەڵچوونەوەیان (ئیستئناف) هەیە.
“سەرکار ڕێبوار”