دۆناڵد ترامپ، سەرۆکی ئەمریکا، بۆ بەشداریکردن لە کۆبوونەوەی وڵاتانی ئەندام لە پەیمانی ناتۆ گەیشتە تورکیا و لە کۆنگرەیەکی ڕۆژنامەوانیدا لەگەڵ ڕەجەب تەیب ئەردۆغان، سەرۆکی تورکیا، باسی لە ڕۆڵی ئەو وڵاتە لە ڕووبەڕووبوونەوەی نێوان ئەمریکا و ئێران کرد.
ترامپ ئاماژەی بەوە دا ئەنقەرە “ئێران و کێشەکانی پەیوەست بەو وڵاتە زۆر باش دەناسێت” و گوتیشی تورکیا لە پەیوەندی لەگەڵ ئێراندا یارمەتی “زۆر کاریگەری” داوە.
سەرۆکی ئەمریکا تورکیای بە “وڵاتێکی سەربازیی زۆر بەهێز” ناو برد و سەبارەت بە گرژییەکانی نێوان ئەو وڵاتە و ئیسرائیل گوتی: “ئەوان دەیانتوانی بچنە ناو شەڕەوە، بەڵام ئەو کارەیان نەکرد. ڕەنگە بەهۆی منەوە بێت، بەڵام دەیانتوانی لە لایەکی دیکەوە بچنە ناو شەڕەکەوە.”
ترامپ پەیوەندییەکانی تورکیا و ئەمریکای بە “ناوازە” وەسف کرد و باسی لەوە کرد تورکیا بۆ کۆتاییهێنان بە شەڕ لەگەڵ ئێران هەوڵی داوە. ناوبراو لە درێژەی قسەکانیدا دەربارەی ڕووبەڕووبوونەوەی ئەمریکا و ئێران گوتی: “ئەمە تەنانەت شەڕیش نییە، بەڵکوو ئۆپراسیۆنێکی سەربازی و هەوڵێکە بۆ داماڵینی چەکی ئەتۆمی.”
سەرۆکی ئەمریکا جەختی کردەوە ئەنقەرە و واشنتن سەبارەت بە توانای ئەتۆمیی ئێران دیدگایەکی هاوشێوەیان هەیە و گوتی: “پێم وانییە تورکیاش بیەوێت ئێران چەکی ئەتۆمی هەبێت، من لەو بارەیەوە تەواو دڵنیام.”
