ڕاوێژکارێکی ئەردۆغان: جەهەپە هەوڵی دژە دیموکراسی دەدات

ڕاوێژکارێکی سەرۆککۆماری تورکیا ڕایدەگەیەنێت پارتی گەلی کۆماری (جەهەپە) هەڵمەتی دژەگەندەڵی لە شارەوانییەکان وەک بیانوو بەکار دەهێنێت بۆ هەنگاوی دژە دیموکراسی و داوا دەکات هەموو لایەنەکان پشتگیری لە پڕۆسەی ئاشتی و دەستووری نوێ بکەن.
مەحمەت ئۆچووم، سەرۆکی دەستەی سیاسەتە یاساییەکانی سەرۆککۆماری تورکیا و ڕاوێژکاری باڵای ئەردۆغان، ڕایگەیاند، پارتی گەلی کۆماری (جەهەپە) ئۆپەراسیۆنەکانی دژ بە گەندەڵی لە شارەوانییەکان دەکاتە بیانوو و هەڵسوکەوتی دژ بە دیموکراسی دەکات.
ئۆچووم گوتی: “سەرۆکی گشتیی جەهەپە لەم دواییانەدا زمانی هەڕەشە لە دژی داواکارانی گشتی و دادوەران و بەرپرسانی دەسەڵات بەکار دەهێنێت و ئەم هەڵسوکەوتانە هەمووی دژی یاسا و دیموکراسین.”
ناوبراو ئاماژەی بە گرنگیی پڕۆسەی ئاشتی کرد و گوتی: “پێویستە جەهەپە بەبێ هیچ مەرجێک پشتگیری لە پڕۆسەی ‘تورکیای بێ تیرۆر’ و داڕشتنی دەستوورێکی نوێ بکات، کە نوێنەرانی ڕاستەقینەی گەل بەشداری تێدا بکەن.”